४० वर्षीय महिलेनं २४ वर्षीय तरुणाला प्रेमाच्या जाळ्यात ओढलं, त्याच्या मदतीने ५० वर्षीय पतीला संपवलं

अकोला : क्राईम वेब सीरिजमध्ये दाखवल्या जाणाऱ्या एखाद्या घटनेप्रमाणेच एक घटना महाराष्ट्रातल्या अकोला जिल्ह्यात घडली. अकोल्यात ४० वर्षीय महिलेनं एका २४ वर्षीय तरुणाला आपल्या प्रेमाच्या जाळ्यात ओढलं, आपलं दुःख त्याच्यासमोर ठेवलं, त्याला हाताशी धरलं, आणि त्याच्याच मदतीनं आपल्या ५० वर्षीय पतीला संपवलं. अकोला जिल्ह्यातल्या ग्राम उगवा गावात ही धक्कादायक घटना समोर आली. दरम्यान पतीच्या हत्यानंतर त्याचा मृतदेह उगवा शेतशिवारातील गवतामध्ये फेकून दिला अन् तब्बल १८ दिवसांनंतर हा मृतदेह समोर आला. अकोला पोलिसांनी चार दिवसांत या संपूर्ण घटनेचा गुह्याचा उलगडा केलाय. या हत्येप्रकरणी आरोपी पत्नीला आणि तिच्या प्रियकराला पोलिसांनी अटक केली आहे. या हत्येमागील कारण म्हणजे मनात निर्माण झालेल्या शंका अन् गैरसमज..पोलिसांनी दिलेल्या माहितीनुसार, १२ ऑक्टोबर अकोल्यातील अकोट फैल पोलीस स्टेशन हद्दीतील ग्राम उगवा शेतशिवाराच्या गवतात ५० वर्षीय अनोळखी व्यक्तीचा मृतदेह आढळून आला होता. हा मृतदेह कुजलेल्या अवस्थेत असल्यानं मृतदेहाची ओळखं पटणे अशक्य होती. शवविच्छेदनासाठी मृतदेह शासकीय रुग्णाल्यात पाठवण्यात आला, आणि वैद्यकीय अहवालात धक्कादायक बाब समोर आली. मृताच्या डोक्यावर, छातीवर मारहाण केल्याच्या जखमा होत्या. पोलिसांनी ‘त्या’ दिशेने तपास सुरू केला, परंतु अकोला पोलिसांसमोर मृतदेहाचं ओळख पटवण्याचं एक मोठं आव्हान होत.
अकोट फैल पोलिसांनी जिल्ह्यातील पोलीस ठाण्यात दाखल असलेल्या सर्व बेपत्ता प्रकरणाची तपासणी सुरू केली. तपासादरम्यान सिव्हिल लाईन पोलीस ठाण्यात एक मिसिंग दाखल होती. त्यामध्ये पन्नास वर्षीय व्यक्तीच्या अंगावर जांभळे शर्ट, कंबरला पट्टा बांधलेल्या अवस्थेत बेपत्ता असल्याचं नमूद होतं. त्यात मृतदेहाजवळ देखील हेचं साहित्य मिळून आलेलं होतं. नातेवाईकांना ठाण्यात बोलावनं दिलं असून ओळख निष्पन्न झाली. विद्यावान बरीळाम प्रधान (वय ५०, राहणार कृषी नगर.) असं मृत व्यक्तीचं नाव..विद्यावान प्रधान आणि कुंकूला (वय ४०) या दोघा पती-पत्नींना एक मुल होतं. मागील दोन ते तीन वर्षांपूर्वी त्याने गळफास घेऊन आत्महत्या केली. या आत्महत्येला तिने आपल्या पतीला जबाबदार धरलं होतं. त्यानंतर दोघांमध्ये सातत्यानं वाद व्हायचे. आणि दोघेही वेगळे-वेगळे राहू लागले. पत्नी शिवणी तर पति कृषी नगरात. पत्नी कुंकूला हे हॉटेलमध्ये काम करायची तर पति विद्यावान याला दारुच व्यसन असल्याने तो रिकामाच होता.मुलाच्या मृत्यूला जबाबदार असलेल्या पतीला संपवण्याचा कट तिने सुरू केला. आपण एकटं काही करू शकणार नाही, यासाठी कोणाला तरी हाताशी घेऊ, असं तिने ठरवलं. ज्या ठिकाणी कुंकूला काम करायची, तिथूनच जवळ असलेल्या एका हॉटेलमध्ये लकी श्रवणजी तेलंते (वय २४ वर्ष रा. मोठी उमरी, अकोला) हा तरुण काम करायचा. त्यानंतर दोघांमध्ये हळूहळू संवाद वाढू लागला, दोघे बाहेर भेटू लागले, मैत्रीही घट्ट झाली. आणि या मैत्रीचे रूपांतर कालांतराने प्रेमात झालं.बघता बघता लकी कुंकूलाच्या प्रेमाच्या प्रचंड आहारी गेला, दोघे एकमेकांसमोर व्यथा मांडू लागले. काही दिवस उलटले आणि तिने आपल्या मनात साठवून ठेवलेलं दुःख त्याच्यासमोर मांडलं. दुःख ऐकल्यानंतर लकीना तिला आधार दिला. त्यानंतर इथून पुढे विद्यावानच्या हत्येचा कट सुरू झाला. तिच्या पतीची संपूर्ण माहिती लकीनं गोळा करून घेतली आणि कामाला लागला.विद्यावानला दारूचे प्रचंड व्यसन होतं, तो नेहमी मुर्तीजापुर रोडवरील बिग सिनेमागृहांसमोर बसायचा. हळूहळू लकीनंही आपला मार्ग इथे वळवला. तोही रोज इथे येऊ लागला, लकी आणि विद्यावानची ओळख झाली, दोघेही सोबत दारु पिऊ लागले. लकीनं त्याचा खर्चही उचलला, अनेकदा टॉकीजमध्ये जाऊन सिनेमा दाखवू लागला. दोघांमध्ये चांगली मैत्री झाली. अखेर विद्यवानच्या हत्येची तारीख ठरली.पोलीस सूत्रांनी दिलेल्या माहितीनुसार मागील माहिन्यातील २४ सप्टेंबर रोजी दोघेही दारू सोबत घेऊन लक्झरी बसनं ग्राम उगवा येथे गेले. इथल्या एका शेतात दोघे दारू प्यायला बसले. रात्री उशिरापर्यंत लकीनं मनसोक्त दारू पाजून विद्यावान डोक्यावर हातातील लोखंडी कळ्यानं वार केले. छातीवर ४० ते ५० वेळा बुक्क्या मारल्या. त्याच्या गुप्तांवरही लोखंडी कळ्यानं मारलं. यामध्ये जखमी होऊन त्याचा जागीच मृत्यू झाला अन् लकीनं घटनास्थळावरून पळ काढला. सुमारे १८ दिवसानंतर विद्यावानचा मृतदेह समोर आला आणि संपूर्ण प्रकरणाचा खुलासा झाला.