मॅनहोलचे झाकण अंगावर पडून विद्यार्थ्याचा मृत्यू, आष्टी येथील हृदयद्राव​क घटना

नागपूर : मॅनहोलचे झाकण अंगावर पडून तिसरीतील विद्यार्थ्याचा मृत्यू झाला. ही हृदयद्रावक घटना कळमेश्वरजवळील आष्टी (येरला) येथील भारतीय विद्या भवन शाळा परिसरात घडली. या घटनने शाळा प्रशासन व विद्यार्थ्यांमध्ये खळबळ उडाली आहे. सारंग होमेश्वर नागपुरे (वय ९, रा. जयताळा रोड) असे मृतकाचे नाव आहे.गुरुवारी दुपारी १.३० वाजताच्या सुमारास सारंग व अन्य विद्यार्थी शाळा परिसरातील मैदानात खेळत होते. खेळता खेळता बॉल मॅनहोलमध्ये गेला. सारंग हा बॉल काढायला आला. बॉल काढण्यासाठी मॅनहोलमध्ये हात टाकला असता अचानक सिमेंटचे झाकण त्याच्या पाठीवर पडले. यात सारंग गंभीर जखमी झाला. अन्य विद्यार्थ्यांनी आरडाओरड करायला सुरुवात केली. शाळेतील शिक्षक धावले. गंभीर जखमी सारंगला मानकापूरमधील खासगी रुग्णालयात दाखल करण्यात आले. डॉक्टरांनी तपासून त्याला मृत घोषित केले. या प्रकरणी मानकापूर पोलिसांनी आकस्मिक मृत्यूची नोंद करून प्रकरण कळमेश्वर पोलिसांकडे वर्ग केले आहे. या घटनेमुळे आज, शुक्रवारी शाळेला सुटी देण्यात आली आहे.सारंगचा अपघात झाला असून, त्याला हॉस्पिटलमध्ये दाखल केल्याची माहिती मिळताच त्याचे नातेवाईक व परिसरातील नागरिकांनी रुग्णालय गाठले. सारंगचा मृत्यू झाल्याचे कळताच नातेवाइकांनी आक्रोश केला. खेळता खेळता मुलाचा जीव गेल्याने नागरिकांनी हळहळ व्यक्त केली. सारंगचे वडील अभियांत्रिकी महाविद्यालयात प्राध्यापक आहेत. त्याची आई वकील असून, सारंगचा मोठा भाऊ प्रथम हा भवन्समध्येच शिक्षण घेत आहे. सारंगच्या मृत्यूचा जबर धक्का नातेवाइकांना बसला आहे. परिसरात शोककळा पसरली आहे.