छत्रपती संभाजीनगर : डॉ. बाबासाहेब आंबेडकर मराठवाडा विद्यापीठ संलग्न महाविद्यालयांना, परिसर, उपपरिसरातील शैक्षणिक विभागांना सहा नोव्हेंबरपासून दिवाळीची सुट्टी सुरू होत आहे. दिवाळीच्या सुट्ट्या २७ नोव्हेंबरपर्यंत असतील.विद्यापीठ प्रशासानाने २०२३-२४ शैक्षणिक सत्राचे वेळापत्रक जूनमध्येच जाहीर केले होते. सत्र सुरू होण्यापूर्वीच शैक्षणिक दिनदर्शिका जाहीर करण्याचा निर्णय कुलगुरू डॉ. प्रमोद येवले यांनी अमलात आणला.
शैक्षणिक वेळापत्रक जाहीर
यंदा प्रवेशप्रक्रियेचे वेळापत्रक लांबल्याने दिवाळी सुट्टीबाबत प्रशासन काय निर्णय घेते, याकडे विद्यार्थी, प्राध्यापकांचे लक्ष होते. शैक्षणिक वेळापत्रकाप्रमाणे दिवाळीची सुट्टी येत्या सोमवारपासून सुरू होत आहे. विद्यापीठाचा छत्रपती संभाजीनगर मुख्य परिसर, धाराशीव येथील उपपरिसर, मॉडेल कॉलेज व चारही जिल्ह्यातील संलग्न महाविद्यालयांसाठी हे वेळापत्रक लागू असेल..सत्रांचे नियोजन
विद्यापीठाच्या कार्यक्षेत्रातील चार जिल्ह्यांत ४७३ महाविद्यालये आहेत. या वेळापत्रकानुसार १५ जून ते ५ नोव्हेंबर दरम्यान प्रथम सत्र आहे. सहा ते २७ नोव्हेंबर दरम्यान दीपावली सुट्ट्या राहतील. तसेच २८ नोव्हेंबर ते दोन मे या काळात द्वितीय सत्र पार पडेल. तीन मे २०२४ पासून उन्हाळी सुट्ट्या राहतील, असे स्पष्ट करण्यात आले आहे.
शाळांची सुट्टी नऊपासून
जिल्ह्यातील शाळांना दिवाळीची सुट्टी नऊ नोव्हेंबरपासून सुरू होत आहे. दिवाळीत वीस दिवसांच्या सलग सुट्ट्या शाळांना मिळणार आहेत. दिवाळीनिमित्त नऊपासून सुट्टया लागतील. त्या २७ नोव्हेंबरला संपणार असून २८ नोव्हेंबरला पुन्हा शाळा सुरू होणार आहेत. शिक्षण विभागाने याविषयी परिपत्रक काढले आहे. यामध्ये म्हटले आहे की, दिवाळीनिमित्त नऊ ते २५ नोव्हेंबर या कालावधीत सुट्ट्या राहतील. त्यानंतर २६ नोव्हेंबर रोजी रविवार आणि २७ नोव्हेंबर रोजी गुरु नानक जयंतीची सुट्टी आहे. त्यामुळे शाळा प्रत्यक्षात २८ नोव्हेंबर रोजी सुरू होतील.
Users Today : 162