आर्थिक अनियमितता आली अंगलट; परभणीचे तत्कालीन शल्यचिकित्सक नागरगोजे निलंबित

परभणी : करोनाकाळात आर्थिक अनियमितता केल्याप्रकरणी परभणी जिल्हा शासकीय रुग्णालयात कार्यरत तत्कालीन जिल्हा शल्यचिकित्सक डॉ. बाळासाहेब नागरगोजे यांच्यावर राज्य सरकारने गुरुवारी (२७ जुलै) निलंबनाची कार्यवाही केली आहे.राज्याचे आरोग्यमंत्री डॉ. तानाजी सावंत यांनी विधानसभेत डॉ. नागरगोजे यांच्या निलंबनाची गुरुवारी घोषणा केली. त्यांच्या विरोधातील चौकशी पूर्ण करीत पुढील कारवाईसुद्धा केली जाईल, असे स्पष्ट केले. डॉ. नागरगोजे परभणी जिल्हा शासकीय रुग्णालयात पाच ऑगस्ट २०१९ ते आठ ऑगस्ट २०२२ या कालावधीत जिल्हा शल्य चिकित्सक म्हणून कार्यरत होते. विशेषतः करोनाकाळात डॉ. नागरगोजे यांनी आर्थिक अनियमितता केल्याचे प्रकरण गाजले होते. डॉ. नागरगोजे यांनी वित्तीय अनियमितता केल्याबाबत आमदार बाबाजानी दुर्राणी, विक्रम काळे, शशिकांत शिंदे, सतीश चव्हाण, अमोल मिटकरी यांनी पावसाळी अधिवेशनात विचारलेल्या प्रश्नांवर माहिती देताना सार्वजनिक आरोग्य व कुटुंब कल्याणमंत्री डॉ. सावंत यांनी खुलासा केला.परभणी जिल्हा रुग्णालयातील तत्कालीन जिल्हा शल्यचिकित्सक यांनी करोनाकाळात केलेल्या वित्तीय अनियमिततेबाबत जिल्हाधिकारी, परभणी यांनी दिलेल्या सूचनेप्रमाणे खरेदीचे लेखा परीक्षण करण्यात आले आहे, हे खरे आहे काय आणि असल्यास, या अहवालाच्या मुद्द्यांच्या अनुषंगाने उपसंचालक यांच्या स्तरावर समिती स्थापन करून चौकशी अहवाल सादर करण्याच्या सूचना संचालक, आरोग्य सेवा (खरेदी कक्ष) मुंबई यांना दोन मार्च २०२३ रोजी वा त्यासुमारास देण्यात आल्या आहेत, हेही खरे आहे काय? असल्यास, उपरोक्त सूचनेनुसार उपसंचालक स्तरावर समिती स्थापन करण्यात आली आहे काय? असल्यास सामितीने अनियमिततेची चौकशी पूर्ण करून अहवाल सादर केला आहे काय, त्यानुसार दोषीवर कोणती कारवाई केली वा करण्यात येत आहे? कारवाई होत असल्यास, हा अहवाल कधीपर्यंत सादर करण्यात येणार आहे, नसल्यास, विलंबाची कारणे काय आहेत? असा सवाल केला होता.त्यावर आरोग्यमंत्री डॉ. तानाजी सावंत यांनी ‘होय, हे खरे आहे,’ असे उत्तर दिले. ‘समितीच्या अहवालामध्ये प्राथमिकदृष्ट्या अनियमितता झाली असल्याचे व याबाबत विशेष लेखापरिक्षण करण्याचे नमूद आहे. या प्रकरणी समवर्ती लेखापरीक्षण झाले असून, लेखापरीक्षणाचे अनुपालन संस्थेकडून प्राप्त झाल्यावर पुढील कार्यवाही करण्यात येईल,’ असेही मंत्री सावंत यांनी स्पष्ट केले.