साहेब, पाकिट मिळालंय, तुमचा वाटा कुठे पाठवू? एक कोटीची लाच घेताना एमआयडीसीचा अधिकारी अटकेत

अहमदनगर : लाचलुचपत प्रतिबंधक विभागाच्या नाशिकच्या पथकाने शुक्रवारी रात्री नगरमध्ये मोठे कारवाई केली आहे. एका कंत्राटदाराकडून आपल्यासाठी आणि बदलून गेलेल्या वरिष्ठांसाठी एक कोटी रुपयांची लाच घेताना महाराष्ट्र औद्योगिक विकास महामंडळाच्या (एमआयडीसी) एका अधिकाऱ्याला अटक करण्यात आली. तर त्याच्या वरिष्ठ अधिकाऱ्याविरूद्धही गुन्हा दाखल करण्यात आला आहे. हे प्रकरण एवढ्यावरच थांबणारे नसून यामध्ये आणखी काही आरोपी असण्याची शक्यता असून पोलिस त्या दृष्टीने तपास करीत आहेत.सहायक अभियंता वर्ग २ अमित किशोर गायकवाड (वय ३२ रा. नागापूर, नगर, मूळ रा. चिंचोली, ता. राहुरी) असे अटक करण्यात आलेल्या आरोपीचे नाव आहे. तो नगर एमआयडीसीमध्ये नियुक्तीला आहे. तेथेच पूर्वी नियुक्तीला असलेले तत्कालीन उपविभागीय अभियंता गणेश वाघ (रा. नगर) यांच्याविरूद्धही गुन्हा नोंदविण्यात आला आहे.सहायक अभियंता वर्ग २ अमित किशोर गायकवाड (वय ३२ रा. नागापूर, नगर, मूळ रा. चिंचोली, ता. राहुरी) असे अटक करण्यात आलेल्या आरोपीचे नाव आहे. तो नगर एमआयडीसीमध्ये नियुक्तीला आहे. तेथेच पूर्वी नियुक्तीला असलेले तत्कालीन उपविभागीय अभियंता गणेश वाघ (रा. नगर) यांच्याविरूद्धही गुन्हा नोंदविण्यात आला आहेछत्रपती संभाजीनगर येथील एका कंत्राटदाराने यासंबंधी फिर्याद दिली आहे. कंत्राटदार अरुण गुलाबराव मापारी यांनी त्यांच्या मापारी इन्फ्रा प्रोजेक्टस या कंपनीमार्फत नगरच्या महाराष्ट्र औद्योगिक विकास महामंडळच्या औद्योगिक वसाहतीमध्ये एक हजार एमएम व्यासाच्या लोखंडी पाईपलाइनचे काम केले होते. त्याचे एक कोटी ५७ हजार ८५ हजार रुपये आणि इतर असे २ कोटी ६६ लाख, ९९ हजार रुपयांचे बिल येणे बाकी होते. ही बिल मिळविण्यासाठी मागील तारखेचे बिल तयार करून त्यावर तत्कालीन उपविभागीय अभियंता गणेश वाघ यांच्या सह्या मिळवून बिल मंजूर करून देतो, असे सांगत सहायक अभियंता गायकवाड याने आपल्यासाठी आणि वाघ यांच्यासाठी म्हणून एक कोटी रुपयांच्या लाचेची मागणी केली होती.कंत्राटदार मापारी यांनी लाचलुचपत प्रतिबंधक विभागाकडे तक्रार केली. त्यानुसार नाशिकच्या पथकाने सापळा रचला. ३ नोव्हेंबरला सायंकाळी लाचेची रक्कम शेंडी बायपासजवळ घेण्याचे ठरले होते. त्यानुसार आरोपी गायकवाड तेथे वाहनातून आला होता. पथकाने फिर्यादीकडे पन्नास हजार रुपयांच्या खऱ्या नोटा तर इतर खेळण्यातील नोटा, अशा स्वरूपात एक कोटी रुपये वाटावेत अशा रकमेची बंडल तयार करून दिले होते.ठरल्याप्रमाणे आरोपी गायकवाड नगर ते संभाजीनगर रोडलगत मोकळ्या पटांगणात इनोव्हा गाडीतून आला. तेथे त्याने पंचासमक्ष ही रक्कम स्वीकारली. एवढेच नाही तर तेथूनच आपल्या मोबाईलवरून दुसरा आरोपी वाघ याला फोन केला. लाचेच्या रकमेचे वाटप करण्यासंबंधी त्यांच्यात संभाषण झाले. गायकवाड याने सांगितले की, पैसे मिळाले आहेत. तुमच्या हिस्स्याची रक्कम कोठे पाठवू? यावर वाघ याने विचारले काय केलं त्यांनी? त्यावर गायकवाड म्हणाला, यांनी दिले सर ते एकच पाकिट. यावर वाघ म्हणाला, राहु दे तुझेकड़ेच. बोलतो मी तुला. ते तुलाच एका ठिकाणी पोहचवायचे आहे. कोठे ते सांगतो मी तुला नंतर. सध्या ठेव तुझ्या सेफ कस्टडीमध्ये, असे वाघ याने गायकवाड यांना सांगितले.हे संभाषण पंचासमक्ष झाले. त्यामुळे या गुन्ह्यात वाघ याचाही सहभाग निष्पन्न झाल्याने पोलिसांनी त्याच्याविरूद्धही गुन्हा दाखल केला आहे. नाशिकच्या पथकाने ही कारवाई केली. लाचलुचपत प्रतिबंधक विभागाचे अप्पर पोलिस महासंचालक विश्वास नांगरे पाटील स्वत: या कारवाईवर देखरेख ठेवून होते. गायकवाड आणि वाघ यांच्यासोबतच आणखी काही आरोपी असण्याची शक्यता असल्याने त्या दृष्टीने तपास सुरू आहे.