उपोषणामुळे अशक्तपणा, किडनीलाही सूज, मनोज जरांगेंवर रुग्णालयात उपचार, कशी आहे प्रकृती?

छत्रपती संभाजीनगर : नऊ दिवस आमरण उपोषण केल्यानंतर मराठा आरक्षण आंदोलनाचे नेते मनोज जरांगे यांना उपचारासाठी शहरातील खासगी रुग्णालयात दाखल करण्यात आले आहे. सततचे दौरे आणि उपोषणामुळे त्यांना अशक्तपणा जाणवत आहे. पुढील दहा दिवस त्यांच्यावर उपचार केले जाणार आहेत.मराठा आरक्षणासाठी मनोज जरांगे यांनी आंतरवाली सराटी (ता. अंबड) येथे सलग नऊ दिवस आमरण उपोषण केले. त्यांनी उपोषण मागे घेतल्यानंतर उपचारासाठी गुरुवारी मध्यरात्री त्यांना छत्रपती संभाजीनगर शहरातील चेतक घोडा चौक परिसरातील खासगी रुग्णालयात दाखल करण्यात आले. त्यांचा रक्तदाब आणि शर्करा पातळी कमी झाली असून, अशक्तपणा जाणवत आहे.रुग्णालयात त्यांच्या वैद्यकीय चाचण्या करण्यात आल्या असून, निदानानुसार किडनीवर काही प्रमाणात सूज असल्याचे डॉक्टरांनी सांगितले. उपचाराला ते उत्तम प्रतिसाद देत असून, आणखी १५ दिवस उपचार घ्यावे लागणार आहेत. सध्या जरांगे यांना शारीरिक हालचाल करण्यास आणि बोलण्यास मर्यादा येत आहेत. राज्यभरातील दौरे आणि उपोषणामुळे जरांगे यांची प्रकृती खालावली आहे.दरम्यान, जरांगे यांना भेटण्यासाठी रुग्णालयात नागरिकांची गर्दी झाली आहे. रुग्णालय प्रशासनाच्या विनंतीनंतर जरांगे यांना भेटण्यास मनाई करण्यात आली आहे; तसेच खासगी सुरक्षारक्षक नेमण्यात आले आहेत. पोलिस प्रशासन जरांगे यांच्या सुरक्षिततेची काळजी घेत भेटण्यासाठी येणाऱ्या प्रत्येक नागरिकाची नोंद ठेवत आहे. रुग्णालयात जवाहरनगर पोलिस ठाण्याचे कर्मचारी नेमण्यात आले आहेत. आमदार राजेश टोपे यांनी शुक्रवारी सकाळी मनोज जरांगे यांची भेट घेऊन प्रकृतीची विचारपूस केली.