नाशिक : आर्थिक विवंचनेत असलेल्या तरुणाने सीबीएसनजीकच्या लॉजमध्ये गळफास घेत आत्महत्या केल्याची घटना गुरुवारी घडली. शुभम प्रल्हाद गोळे (वय २३, रा. निफाड) असे आत्महत्या करणाऱ्या तरुणाचे नाव आहे. शुभमकडे बनावट शासकीय ओळखपत्र आढळले असून, त्याने शासकीय नोकरीच्या आमिषाने अनेकांना गंडा घातल्याची धक्कादायक माहिती समोर येत आहे. या प्रकरणी सरकारवाडा पोलिस तपास करीत आहेत.सीबीएस येथील मेळा बसस्थानकासमोरील लॉजमध्ये गुरुवारी (दि. २) सायंकाळी साडेसहाला लॉज कर्मचाऱ्यांना एका खोलीत शुभम गळफास घेतलेल्या अवस्थेत आढळला. त्यांनी तातडीने सरकारवाडा पोलिसांना माहिती दिली. वरिष्ठ पोलिस निरीक्षक दिलीप ठाकूर हे उपनिरीक्षक प्रकाश नेमाणे यांच्या पथकाने पंचनामा करून मृतदेह जिल्हा रुग्णालयात पाठवला. त्यानंतर आकस्मिक मृत्यू दाखल करून पोलिसांनी तपास सुरू केला. शुभम निफाड येथील रहिवासी असून, त्याने पदवीपर्यंत शिक्षण घेतल्याची माहिती पुढे आली आहे. वडील खासगी सुरक्षा रक्षक म्हणून कार्यरत आहेत.
शुभम वर्षभरापासून रेल्वेत नोकरीला असल्याची बतावणी घरी आणि गावी करायचा. त्यासाठी त्याने बनावट शासकीय ओळखपत्र बनविले होते. इतरांनाही त्याने शासकीय नोकरीचे आमिष दाखवले. त्या बदल्यात त्याने काही जणांकडून पैसे घेतले होते. हे पैसे त्याने कुठे खर्च केले, त्याचा उदरनिर्वाह कसा सुरू होता या संदर्भातील तपास पोलिस करीत आहेत. मात्र, त्याने आर्थिक विवंचनेतून आत्महत्या केल्याचे प्राथमिक तपासात उघड झाले आहे.
Users Today : 25