नाशिकरोड : या-ना त्या कारणाने सतत चर्चेत असणारे नाशिकरोड येथील महापालिकेचे बिटको रुग्णालय आता मद्याच्या बाटल्यांमुळे चर्चेत आले आहे. रुग्णालयाच्या अतिदक्षता विभागाबाहेरील कोपऱ्यात मद्याच्या बाटल्यांचा खच आढळून आल्याने नागरिकांनी सखेद आश्चर्य व्यक्त करून हे रुग्णालय आहे की मद्यपींचा अड्डा, असा प्रश्न उपस्थित केला आहे.
अत्यंत अल्प खर्चात आणि दर्जेदार वैद्यकीय उपचार मिळाल्याने आजवर हजारो गरजू रुग्णांचे प्राण वाचविण्यात महत्त्वाची भूमिका पार पडलेल्या हिंदूहृदयसम्राट बाळासाहेब ठाकरे रुग्णालय अर्थात बिटको रुग्णालयाच्या अतिदक्षता विभागाबाहेर मद्याच्या बाटल्यांचा खच आढळून आला. रुग्णांचे प्राण वाचविण्यासाठी जिथे देवदूतरुपी डॉक्टर्स रुग्णांची सेवा करतात त्या पवित्र ठिकाणीच रात्रीच्या वेळी मदिरापान रंगत असल्याची धक्कादायक बाब यामुळे उघडकीस आली आहे. विशेषत: या रुग्णालयात चोवीस तास सुरक्षारक्षक उपस्थित असतात. मात्र, तरीही मद्यपान करणाऱ्यांचा थेट रुग्णालयात शिरकाव होत असल्याने आश्चर्य व्यक्त होत आहे. बेमुदत उपोषणादरम्यान प्रकृती खालावलेले माजी नगरसेवक संतोष साळवे यांना बिटको रुग्णालयात उपचारासाठी दाखल करण्यात आले होते. त्यावेळी त्यांच्यासमवेत असलेल्या पदाधिकाऱ्यांच्या ही बाब लक्षात आली.रात्रीस खेळ चाले…
बिटको रुग्णालयाची इमारत मोठी असून, काही दालने वापराविना पडून आहेत. रात्रीच्या वेळी या रुग्णालयात केवळ अतिदक्षता विभागात डॉक्टर उपलब्ध असतात. इतर सर्व विभागांत इनचार्ज सिस्टर्स, स्टाफ नर्स, वॉर्ड बॉय कर्तव्यावर असतात. बऱ्याचदा रुग्णालयात दाखल रुग्ण, त्यांचे नातेवाइक स्टाफ, डॉक्टर्स यांच्याशी वाद घालतात. राजकीय दबावही आणतात. रुग्णालयातून बाहेरही जातात. अनेकदा काही रुग्णांचे सहकारी रात्री थेट रुग्णालयात येतात. त्यांच्याकडून मद्यपान केले जात असल्याचे बोलले जात आहे. वारंवार घडणाऱ्या या प्रकारामुळे येथील कर्मचारीही हतबल झाले आहेत. रुग्णालयाच्या पार्किंगमध्ये तळघरात नेहमीच मद्यपींचा धुडगूस असतो. अशावेळी सुरक्षारक्षक नेमके काय करतात, हा प्रश्न या निमित्ताने उपस्थित होत आहे.- रुग्णालयातील अनेक दालने वापराविना
– चोवीस तास सुरक्षारक्षक असूनही गैरप्रकार
– रुग्णांसमवेत थांबणाऱ्या नातेवाइकांकडूनच होताहेत प्रकार
– रुग्णालय पार्किंगमध्ये अनेकदा मद्यपींचा धुडगूस
– महापालिका प्रशासनाचे दुर्लक्ष
Users Today : 25