सातशे रुपयांनी घरंगळला कांदा; आवक कमी होऊनही भाव उतरल्याने शेतकरी चिंतेत

निफाड : केंद्र सरकारने ४० टक्के निर्यातशुल्क रद्द केल्यानंतरही आणि कांद्याची आवक कमी होऊनही लासलगाव बाजार समितीमध्ये तीन दिवसांत कांद्याच्या दरांत प्रतिक्विंटल ७०० ते ८०० रुपयांची घसरण झाली आहे.कांद्याची मागणी वाढली असून, पुरवठा मात्र कमी आहे. अशा वेळी कांद्याच्या बाजारभावात वाढ होणे अपेक्षित असताना दरदिवशी दर घसरत आहेत. खराब हवामान आणि लांबलेला पाऊस यामुळे यावर्षी लाल कांद्याची लागवड उशिराने झाली. शिवाय कांद्याच्या दरात सततची होणारी घसरण आणि त्यामुळे होणारे आर्थिक नुकसान त्यामुळे लाल कांद्याची लागवडही कमी आहे. शिवाय अजूनही लाल कांद्याची आवक अपेक्षेइतकी सुरू झालेली नाही. दर कमी होत असल्याने शेवटच्या टप्प्यात शिल्लक असलेल्या कांद्याला भाव मिळतील, ही अपेक्षा फोल ठरली आहे. ४० टक्के निर्यात शुल्क रद्द करून ८०० डॉलर निर्यातमूल्य लावल्याने व्यापारीही चक्रावले असून, परिणामी कांदा खरेदीसाठी ते हिंमत करीत नसल्याने दर कोसळत असल्याचे निरीक्षण तज्ज्ञांनी नोंदवले आहे.शुक्रवारी लासलगाव बाजार समितीमध्ये उन्हाळ कांद्याची आवक ७५०० क्विंटल होती. कांद्याला किमान १४००, कमाल ४,२४६ रुपये दर मिळाला, तर सरासरी दर ३,६५० रुपये होता.गेल्या आठवड्यातील कांदा दर

गेल्या आठवड्यातील कांदा दर

लासलगाव बाजार समिती
दिनांक – किमान दर – कमाल दर – सरासरी दरदि. २६ ऑक्टो. – २२०१ -५००१-४६२५
दि. २८ ऑक्टो. – २००० – ५२५२- ४८००
दि. ३० ऑक्टो. – १९०१- ५२००- ४६००
दि. १ नोव्हें. – २००० – ४८९९- ४२००
दि. २ नोव्हें. -१५००- ९५९६- ३९००
दि. ३ नोव्हें. – १४००- ४२४६-३६५०

पिंपळगाव बाजार समिती

दि. २६ ऑक्टो. -४०००- ५७८१- ४८००
दि. २८ ऑक्टो. -३८००- ५६२१- ४७००
दि. ३० ऑक्टो. -१९०१- ५२००- ४६००
दि. १ नोव्हें. -३३०० -५४५२- ४२००
दि. ३ नोव्हें.- २७०० – ४७००- ३७००