जानेवारीमध्ये राम मंदिराचा लोकार्पण सोहळा, विदर्भातील १५ लाख घरी अक्षता देऊन निमंत्रण

,नागपूर : अयोध्या येथील भव्य राम मंदिराचा लोकार्पण सोहळा येत्या २२ जानेवारीला होणार आहे. यानिमित्त संपूर्ण देशभरात लोकार्पण अक्षतांचे वाटप करण्यात येणार आहे. त्या अंतर्गत विदर्भात १ ते १५ जानेवारीदरम्यान साडेदहा हजार गावातील पंधरा लाख घरी अक्षता देऊन लोकार्पणाचे निमंत्रण देण्यात येईल, अशी माहिती विश्व हिंदू परिषदेचे (विहिंप) महाराष्ट्र आणि गोवा प्रांत मंत्री गोविंद शेंडे यांनी शुक्रवारी पत्रपरिषदेत दिली.प्रभू श्रीरामचंद्र यांचे मंदिर अंतिम टप्प्यात असून लोकार्पण सोहळ्याचा दिवस जाहीर झाला आहे. त्या अंतर्गत विविध उपक्रमांची योजना श्रीराम जन्मभूमी न्यासतर्फे संपूर्ण देशभरात करण्यात आली आहे. त्या पार्श्वभूमीवर ५ नोव्हेंबरला देशभरातील २०० कार्यकर्त्यांना श्रीराम जन्मभूमी मंदिरात पुजित अक्षता, प्रभू श्रीरामाचे छायाचित्र आणि माहितीपुस्तक देण्यात येणार आहे. या अनुषंगाने विदर्भ प्रांतातून विहिंपचे प्रांत सहमंत्री अमोल अंधारे आणि यवतमाळ विभाग मंत्री राम लोखंडे हे दोन पदाधिकारी अक्षता घेण्यासाठी अयोध्येला जाणार आहेत.
अयोध्येहून आणलेल्या अक्षतांचे २७ नोव्हेंबरला येथील पोद्दारेश्वर राम मंदिरात विधिवत पूजन करून विदर्भातील सर्व जिल्हाप्रमुखांना देण्यात येतील. या अक्षता, श्रीरामाचे छायाचित्र आणि माहितीपुस्तक १ ते १५ जानेवारीदरम्यान श्रीराम जन्मभूमी मंदिर निधी समर्पण अभियान दरम्यान संपर्क केलेल्या साडेदहा हजार गावांतील पंधरा लाख घरी देऊन आमंत्रित करण्यात येईल, असे गोविंद शेंडे म्हणाले. यावेळी पत्रपरिषदेला विदर्भ प्रांत अध्यक्ष राजेश्वर निवल, प्रांत मंत्री प्रशांत तितरे, प्रांत सहमंत्री अमोल अंधारे, यवतमाळ विभाग मंत्री राम लोखंडे, विदर्भ प्रांत प्रचार प्रसार प्रमुख निरंजन रिसालदार, नागपूर महानगर मंत्री अमोल ठाकरे उपस्थित होते.