बुलढाण्याच्या सुकन्येची इस्रोपर्यंत झेप, अवकाश संशोधन क्षेत्रात JRF मिळवली, जिजाऊंच्या लेकीनं करुन दाखवलं

बुलढाणा : अंतराळ संशोधन संस्था इस्त्रोमध्ये बुलढाण्याच्या लेकीची निवड झाली आहे. दोन जागांच्या मुलाखतीत जिल्ह्यातील जिजाऊच्या लेकीला बहुमान मिळाला आहे. अंतराळ संशोधन कार्ययात नेत्रदिपक कामगिरी करून आणि नुकत्याच झालेल्या चांद्रयान मोहिमेतून देशाला अभिमानास्पद यश मिळवून देणाऱ्या इस्त्रो या संशोधन संस्थेत ज्युनिअर रिसर्च फेलो (जे.आर .एफ) म्हणून कुमारी शिवानी राजेश देशमुख या तरुणीची निवड झाली आहे.दोन पदांसाठी हैद्राबाद येथे झालेल्या मुलाखतीमध्ये एकमेव महाराष्ट्रीयन मुलगी म्हणून बुलढाण्याच्या खामगाव तालुक्यातील कंजारा येथील जिजाऊंच्या लेकीला हा बहुमान मिळाला आहे.शिवानी ही अमरावती येथे श्री शिवाजी विज्ञान महाविद्यालयात सहाय्यक व्याख्याता म्हणून सेवेत कार्यरत होती. तिचे वडील राजेश उर्फ निळकंठ राव हिम्मतराव देशमुख हे आर्वी येथे सिव्हिल कॉन्ट्रॅक्टर म्हणून काम करतात. ती गव्हर्नन्स सायन्स इन्स्टिट्यूट या कॉलेजमधील पर्यावरण शास्त्रातील पदविका धारक एमएससी असून तिचे दहावी – बारावी पर्यंतचे शालेय शिक्षण हे आरवीमध्ये झाले.मुळातच बुद्धीने तल्लक आणि अभ्यासात हुशार असलेल्या शिवानीची पर्यावरण आणि संशोधन क्षेत्रात असलेली आवड आणि या जोडीला एकाग्रता आणि अभ्यासू वृत्ती जोपासण्याच्या कठोर प्रयत्नांमुळे इस्त्रो संशोधन संस्थेत तिची निवड झाली आहे. शाळा महाविद्यालयातून शिक्षकाचे आणि आई-वडिलांचे मार्गदर्शन आणि संस्कारामुळे आपल्यालाइस्त्रोपर्यंत पोहोचता आल्याच्या भावना शिवानीने व्यक्त केल्या आहेत.शिवानीचे आई-वडील सुद्धा कलेचे उपासक असून तिचे वडील राजू देशमुख हे उत्तम गायक आहे. शिवानीला अंतराळ संशोधन संस्थेत निवड होण्याच्या मिळालेल्या बहुमानाबद्दल तिचे लोक स्वातंत्र पत्रकार महासंघ या विविध क्षेत्रातील अग्रसेर व्यक्तींना प्रोत्साहन आणि प्रेरणा देण्यात सक्रिय असलेल्या समाजभिमुख राष्ट्रीय संघटनेचे संस्थापक राष्ट्रीय अध्यक्ष संजय देशमुख निंबेकर यांचासह राजीव देशमुख यांच्या आणि शिवानीच्या असंख्य मित्र, मैत्रिणींचा आप्तस्वकीयचा आणि स्नेहजणांनी कौतुक केलं आहे.