बॅरेकच्या खिडकीतून पडून डोक्याला गंभीर इजा, वाशिमच्या सुपुत्राला सियाचीनमध्ये वीरमरण

शहीद आकाश यांचे पार्थिव १२ सप्टेंबर रोजी रात्री भारतीय सेनेच्या विमानाने नागपूर येथे पोहोचणार आहे. १३ सप्टेंबरला समृद्धी महामार्गाने शिरपूर (जैन) पोहोचल्यानंतर दुपारी १२ वाजताच्या सुमारास शहीद आकाश यांच्या पार्थिवावर शासकीय इतमामात अंतिम संस्कार करण्यात येणार आहेत.

४ सप्टेंबरचे संभाषण ठरले अखेरचे

मागील चार महिन्यांपूर्वीच आकाश यांची लेह येथे बदली झाली होती. ते पुढील १५ दिवसांनी गावी येणार होते. ४ सप्टेंबर रोजी कुटुंबीयांसोबत मोबाईलवरून त्यांचे बोलणेही झाले होते. मात्र गावी येण्यापूर्वीच नियतीने डाव साधला आणि आकाश आढागळे यांना वीरगती प्राप्त झाली. ४ सप्टेंबरचे कुटुंबियांशी झालेले संभाषण हे अखेरचे ठरले.

लहान भाऊही सैन्यात

शिरपूरच्या दलित वस्तीत राहणारे काकाराव अढागळे यांना तीन मुले व एक मुलगी अशी अपत्ये होती. पंधरा वर्षांपूर्वीच काकाराव अढागळे यांचा मृत्यू झाला. त्यांच्या मृत्यूनंतर मुलांनी व आईने प्रचंड कष्ट केले. मोठ्या मेहनतीने आकाश व नितीन हे दोघे भाऊ भारतीय सैन्य दलात भरती झालेमागील पाच वर्षांपूर्वी त्याचा रुपाली हिच्याशी आकाश यांचा विवाह झाला होता. त्यांना चार वर्षाची तन्वी नामक मुलगी सुद्धा आहे. जवानाच्या निधनाची माहिती मिळाल्यापासून कुटुंबियांसह गावकऱ्यांच्या डोळ्यातील अश्रू थांबत नाहीयेत.