वाशिम : सरकारी कर्मचारी, अधिकाऱ्यांच्या गलधानपणाचा फटका कुणाला केव्हा बसेल काही सांगता येत नाही. वाशिम जिल्ह्यातील मानोरा तालुक्यातील कारखेडा गावच्या ८५ वर्षीय रत्नप्रभाबाई रामराव देशमुख यांना असाच फटका बसला आहे. वयोवृद्ध असलेल्या या आजींना निराधार असल्याने श्रावणबाळ निराधार योजने अंतर्गत दरमहा पेन्शन मिळत होती. मात्र, त्यांच्या गावाच्या तलाठ्याने त्या मृत झाल्याचे समजून तहसीलदारांना तसा अहवाल दिला आणि त्यांची पेन्शन बंद झाली. आधीच वयोवृद्ध त्यात पेन्शनही बंद झाल्याने त्यांच्या उदरनिर्वाहाचा प्रश्न निर्माण झाला आहे. आता ह्या आजी तहसील कार्यालयात पेन्शन सुरू करण्यासाठी चकरा मारत आहेत.रत्नप्रभाबाई देशमुख यांना २००५ पासून मानोरा तहसील कार्यालयातून श्रावण बाळ योजने अंतर्गत पेन्शन लागू करण्यात आली होती. घरात एकटी महिला, कमविता कोणी नाही, वय जास्त झाल्याने मजुरीचे काम होत नसल्याने पेन्शन योजनेचा मोठा आधार त्यांना होता. रत्नप्रभाबाई देशमुख ह्या जेव्हा जून महिन्यात पेन्शनचे पैसे काढण्यासाठी बँकेत गेल्या तेव्हा बँकेकडून त्यांना पेन्शन जमा झाली नाही, असे सांगण्यात आले.
पेन्शनबाबत नेमकी काय अडचण आली, याची विचारणा करण्यासाठी त्या नातेवाईकासह तहसिल कार्यालयात गेल्या असता, तलाठी सागर चौधरी यांनी या महिलेचा मृत्यू झाला असा अहवाल २९ जुलै २०२२ रोजी कार्यालयास दिल्याने पेन्शन बंद झाल्याचे उत्तर त्यांना देण्यात आले.हे ऐकून रत्नप्रभाबाई यांना धक्काच बसला. कोणतीही शहानिशा न करता चुकीचा अहवाल देणाऱ्यांवर कारवाई व्हावी तसेच पेन्शन पुन्हा सुरू व्हावी, अशी मागणी त्यांनी केली आहे. एकीकडे महाराष्ट्र सरकार गतिमान कारभाराचा दावा करत असतांना कर्मचारी मात्र त्याला गांभीर्याने घेत नसल्याचे निदर्शनास येत आहेतहसील कार्यालयकडून पेन्शन सुरु असलेल्या व्यक्तीने हयातीचे दाखले व इतर माहिती दरवर्षी स्वतः देणे आवश्यक आहे. मात्र देशमुख आज्जी कडून तशी माहिती दिली गेली नाही. एक महिना वाट पाहली. त्या आल्या नाही मग मी त्या मयत झाल्या असाव्यात असे गृहीत धरून तसा अहवाल तहसीलदारांना दिला, अशी माहिती तलाठी सागर चौधरी यांनी दिली आहे. मात्र, आपण रोज ज्या गावात जातो तिथे साधी चौकशी तलाठ्याने का केली नाही असा सवाल आता उपस्थित होत आहे.
Users Today : 18