नाशिक जिल्ह्यातील ४५ ग्रामपंचायतीसाठी ९० टक्के मतदान, आज मतमोजणी

नाशिक : जिल्ह्यातील ४५ ग्रामपंचायतींच्या सार्वत्रिक व पोटनिवडणुकांसाठी रविवारी (दि. ५) मतदान प्रक्रिया पार पडली. निवडणुकीत ९० टक्के मतदारांनी मतदानाचा हक्क बजावला. उमेदवारांचे भवितव्य ईव्हीएममध्ये बंद झाले असून, आज सोमवारी (दि. ६) सकाळी १० वाजता संबंधित तहसील कार्यालयांमध्ये मतमोजणी होणार आहे.२०२४ हे वर्ष निवडणुकांचे असणार आहे. परंतु, या वर्षात कार्यकाळ संपणाऱ्या ग्रामपंचायतींसाठी मतदान प्रक्रिया राबविणे आवश्यक होते. त्यानुसार जिल्ह्यात ४५ ग्रामपंचायतींमधील २०० जागांसाठी रविवारी मतदान घेण्यात आले. सकाळपासूनच मतदारांचा उत्साह पहायला मिळाला. दुपारी दीडपर्यंत ३० टक्के ग्रामस्थांनी मतदान केले. दुपारनंतर गर्दी काहीशी कमी झाली. दुपारी साडेतीनपर्यंत सरासरी ७२ टक्के मतदान झाले होते. त्यानंतर पुन्हा गर्दी वाढू लागली. सायंकाळी साडेपाचपर्यंत मतदानाची वेळ असली तरी रांगेत मतदार उभे असल्याने काही ठिकाणी सायंकाळपर्यंत ६६ हजार ८०० ग्रामस्थांपैकी सुमारे ९० टक्के मतदारांनी मतदानाचा हक्क बजावला.१९ ग्रामपंचायतींमधील सदस्यांच्या १९ व थेट सरपंचाच्या तीन अशा एकूण २२ रिक्तपदांसाठी मतदान घेण्यात आले. पोटनिवडणुकांसाठीही सुमारे ९० टक्के मतदान झाले. मंगळवारी (दि. ६) तहसील कार्यालयांमध्ये सकाळी दहापासून मतमोजणीला सुरुवात होणार आहे. दुपारी १२ पर्यंत निकालाचे चित्र स्पष्ट होणार आहे.