स्वातंत्र्य शाहिरांच्या संपूर्ण कुटुंबाला करंट देऊन संपवण्याचा प्रयत्न, थेट ट्रान्सफॉर्मरमधून वायर टाकली अन्…

मिळालेल्या माहितीनुसार, स्वातंत्र्यशाहिर कै. शंकरराव निकम यांचे मोठे सुपूत्र अशोकराव निकम हे वांगी गावच्या उत्तरेस शिवणी रोडलगत कुटुंबियांसह राहतात. मंगळवारी अशोक निकम आपली पत्नी व दोन मुलांसह जेवण करून झोपले. दरम्यान, रात्री १ वाजता अचानक घरासमोर विजेचा मोठा जाळ झाला व घरातील लाईट गेली. मात्र, घराजवळ ट्रांसफार्मर असल्यामुळे त्यांनी ट्रांसफार्मरमध्ये जाळ झाला असेल, असे समजून दुर्लक्ष केले. मात्र, दुसऱ्यांदा वीज आल्यानंतर घरालगत जाळ झाल्यामुळे त्यांनी घरातील सर्वांना जागे केले.बॅटरीच्या सहाय्याने बाहेर पाहिल्यास त्यांना विजेच्या विद्युत वाहक तारा घराच्या दरवाजाजवळ अडकवलेली दिसून आली. हे पाहताच ते घाबरले. नायलॉनच्या दोरीने सुमारे एक हजार फूट अंतरावरून या जोडलेल्या तारांचे नियंत्रण करायचे आणि ट्रान्सफॉर्मर सुरू करण्याची तार खेचायची अशा हेतूने हल्लेखोरांनी त्याची जोडणी केली होती. त्यांनी बाहेर येऊन पाहिले असता घरासमोर असलेल्या ट्रांसफार्मरवरील ११ केव्ही तारेतून घराच्या पुढील व मागील दरवाजास विद्युत वाहक तारेने करंट दिल्याचे दिसून आले. तर करंट दिलेली तार काढून घेऊन जाण्यासाठी त्या तारेला एक हजार फूट लांब दोरी बांधून ती बाजूला असलेल्या उसातून जोडून ठेवली असल्याचे दिसून आले.

घरातील लोक बाहेर आल्यावर अज्ञात काही जण ती दोरी ओढण्याचा प्रयत्न करत होते. मात्र, त्यांना त्यामध्ये अपयश आले. त्यानंतर त्यांनी घटनास्थळापासून पलायन केले. सावध झालेल्या निकम कुटुंबीयांनी हा आपल्याला सहकुटुंब मारून टाकण्याचा डाव आहे हे जाणून तातडीने बचावाच्या हालचाली केल्या. या दरम्यान काही लोक तेथे मोठमोठ्याने बोलत असल्याचे आणि पिकाचा फायदा घेऊन धावत असल्याचे त्यांच्या निदर्शनास आले. मात्र, हे हल्लेखोर कोण होते त्याचा अंधारामुळे सुगावा लागला नाही