आपण समाजाचे देणे लागतो हे विसरु नका! अभिनेते विजय गोखले यांचा रंगकर्मींना सल्ला

, नाशिक : ‘आपल्याकडून समाजप्रबोधनाचे महत्त्वाचे कार्य होत असल्याचा अभिमान बाळगा. पण, आपण समाजाचे देणेही लागतो, याचा विसर पडू देऊ नका,’ असा सल्ला ज्येष्ठ अभिनेते तथा रंगभूमी परिनिरीक्षण मंडळाचे अध्यक्ष विजय गोखले यांनी रंगकर्मींना दिला.अखिल भारतीय मराठी नाट्य परिषदेच्या नाशिक शाखेच्या वतीने मराठी रंगभूमी दिनानिमित्त आयोजित पुरस्कार वितरण समारंभात प्रमुख पाहुणे म्हणून ते बोलत होते. महाकवी कालिदास कलामंदिरात रविवारी (दि. ५) हा कार्यक्रम झाला. कालिदास कलामंदिराचे व्यवस्थापक मोहन गिते, नाट्य परिषदेचे अध्यक्ष रवींद्र कदम, राजेंद्र जाधव आदी व्यासपीठावर उपस्थित होते. यावेळी गोखले यांच्या हस्ते अनिता दाते यांना शांता जोग स्मृती पुरस्काराने, सुनील ढगे यांना दत्ता भट स्मृती पुरस्काराने, सचिन शिंदे यांना प्रभाकर पाटणकर स्मृती पुरस्काराने, रवींद्र कटारे यांना नेताजी भोईर स्मृती पुरस्काराने, प्रा. विजय कुमावत यांना वा. श्री. पुरोहित स्मृती पुरस्काराने, पीयूष नाशिककर यांना जयंत वैशंपायन स्मृती पुरस्काराने, श्रीकांत गायकवाड यांना डॉ. रामदास बरकले स्मृती पुरस्काराने, शाहीर शंकर जाधव यांना गजाभाऊ बेणी स्मृती पुरस्काराने, राजेश जाधव यांना विजय तिडके स्मृती पुरस्काराने, आनंद ओक यांना सुमन माटे स्मृती पुरस्काराने, प्रफुल्ल दीक्षित यांना गिरिधर मोरे स्मृती पुरस्काराने, तर महेश डोकफोडे यांना रंगतपस्या पुरस्काराने गौरविण्यात आले.प्रत्येकी दोन हजार रुपये व मानचिन्ह असे या पुरस्कारांचे, तर ११ हजार रुपये व मानचिन्ह असे रंगतपस्या पुरस्काराचे स्वरूप होते. याशिवाय डॉ. शेफाली भुजबळ, प्रशांत खरोटे, अमित कुलकर्णी व भाग्यश्री काळे यांचाही विशेष गौरव करण्यात आला. प्रारंभी बागेश्री वाद्यवृंदाच्या वतीने नांदी सादर करण्यात आली. अदिती मोराणकर यांनी सूत्रसंचालन केले. पुरस्कार वितरणानंतर नाशिकरोड येथील नवीन मराठी शाळेच्या वतीने बालनाट्य, तर नाट्य परिषदेच्या वतीने ‘अ डील’ ही एकांकिका सादर करण्यात आली.