CAचा GSTला कोट्यवधींचा चुना; बनावट पावत्यांद्वारे करदात्यांची फसवणूक, नेमकं प्रकरण काय?

मालेगाव : शहरातील एका कर सल्लागारास मुंबई माझगाव येथील राज्य वस्तू व सेवाकर, मुंबई शाखेच्या भरारी पथकाने मालेगावात तळ ठोकून अटक केली. सौरभ वर्धमान बुरुड (जैन) असे कर सल्लागाराचे नाव आहे. शहरातील कापड व्यवसायातील करदात्यांना बनावट पावत्या देऊन १०.३९ कोटींचा कर बुडवल्याप्रकरणी ही कारवाई करण्यात आली.संशयित कर सल्लागार बुरुड हे नोंदणीकृत कर सल्लागार म्हणून मालेगावात व्यवसाय करतात. शहरातील व्यावसायिकांना नवीन जीएसटी नोंदणी व जीएसटी रिटर्न भरण्यात ते मदत करतात. त्यामुळे शहरातील व्यावसायिकांची माहिती त्यांच्याकडे सहज उपलब्ध होती. याच माहितीचा उपयोग करून बुरुड यांनी दीड-दोन वर्षांपासून बनावट कंपन्या स्थापन केल्या. प्रत्यक्षात कोणत्याही मालाची देवाणघेवाण न करता त्यांनी व्यवसायाच्या बनावट पावत्या तयार केल्या. नऊ वेगवेगळ्या संस्थांचा वापर करून सुमारे ८६.६० कोटी रुपयांपेक्षा जास्त किमतीच्या बनावट पावत्या त्यांनी तयार केल्या. यातून आयटीसी पास करून १०.३९ कोटी रुपयांचा कर त्यांनी बुडवला. या प्रकरणाची माहिती राज्य जीएसटी विभागाला मिळाली. त्यानुसार मुंबई अन्वेषण विभागाच्या पथकाने मालेगावात दोन दिवस तळ ठोकून संशयितांवर लक्ष ठेवले. गुरुवारी (दि. २) राज्य वस्तू व सेवा कर मुंबई शाखेच्या पथकाने बुरुड यास ताब्यात घेतले. पथकाने शहरात १७ वेगवेगळ्या ठिकाणी छापे टाकून ही कारवाई केली. बुरुड यास न्यायालयात हजर करण्यात आले. ७ नोव्हेंबरपर्यंत न्यायालयीन कोठडी सुनावण्यात आल्याची माहिती राज्य वस्तू व सेवा कर मुंबई शाखेच्या प्रसिद्धीपत्रकात म्हटले आहे.
शहरातील कर सल्लागारावर झालेली कारवाई मुंबई पथकाकडून झालेली आहे. त्यामुळे त्यासंदर्भात अधिक तपशील उपलब्ध नाहीत. परंतु, शहरातील व्यावसायिकांनी व्यवसायासोबत कर व त्यासंबधी बाबींकडे स्वतः लक्ष द्यावे. कर सल्लागारांवर विसंबून राहू नये. आपले आयडी पासवर्ड स्वतःजवळ ठेवावेत – अनुराधा निकम, सहाय्यक राज्यकर आयुक्त कार्यालय मालेगाव