सातारा ते पुणे रेल्वे प्रवास वेगवान होणार, विद्युतीकरणासह दुहेरीकरणबाबत मोठी अपडेट,प्रवासाचा वेळ वाचणार

सातारा : पुणे ते सातारा रेल्वेचे दुहेरीकरण व विद्युतीकरणाचे काम शिंदवणे ते आंबळे वगळता पूर्ण झाले आहे. त्यामुळे या मार्गावरून धावणाऱ्या रेल्वेगाड्या पूर्वीप्रमाणे क्रॉसिंगसाठी न थांबता सुसाट वेगाने धावू लागल्या आहेत. त्यामुळे मार्गावरील लोणंद ते पुणे रेल्वे प्रवास आता अवघ्या दोन तासांवर आला आहे. प्रवाशांनी जास्तीतजास्त रेल्वे सुविधेचा वापर करून रेल्वेने प्रवास करण्याचे आवाहन लोणंद प्रवासी संघटनेने केले आहेराज्यात कांद्याची बाजारपेठ समजल्या जाणाऱ्या सातारा जिल्ह्यातील लोणंदहून पुण्याला जाण्यासाठी सकाळी ७.३० वाजता, १०. ४० वाजता दुसरी कोल्हापूर डेमू एक्सप्रेस, सव्वा एक वाजता कोयना एक्स्प्रेस, दर मंगळवारी सायंकाळी ५.३० वाजता मिरज -पुणे, तसेच रविवार वगळता सायंकाळी ७. २० वाजता फलटण -पुणे एक्स्प्रेस डेमू, सायंकाळी ७.४५ वाजता महाराष्ट्र एक्सप्रेस तर पुण्याहून येण्यासाठी पहाटे ४. २० वाजता महाराष्ट्र एक्सप्रेस, रविवार वगळता ६. १० वाजता पुणे – फलटण डेमू एक्सप्रेस, सकाळी १०.४० वाजता पुणे कोल्हापूर, १२.४० वाजता कोयना एक्सप्रेस, ६. ३० वाजता पुणे -सातारा डेमू, दर मंगळवारी सकाळी ८ वाजता पुणे -मिरज एक्सप्रेस.

रविवारपासून सुरू झालेली विशेष ट्रेन ( पूर्वीची सहयाद्री एक्सप्रेस ) पहाटे ५ वाजता लोणंदहून सुटेल, ती पुण्यात सकाळी ७.४५ ला पोहोचेल. पुन्हा हिच गाडी पुण्यातून रात्री ९. ४५ वाजता सुटणार आहे ती लोणंदला रात्री ११.२४ मिनिटांनी पोहोचेल. या रेल्वेगाड्या प्रवाशांच्या सोयीसाठी उपलब्ध आहेत. आता पूर्वीच्या पॅसेंजरप्रमाणे पुण्याला जाण्यास व येण्यास वेळ लागत नसून सर्व रेल्वे गाड्या वेळेवर व पूर्वीपेक्षा कमी वेळेत पोहोचत आहेत.फक्त ५० रुपये तिकीटावर कोणत्याही रेल्वेगाडीने जलद, सुखकर व सुरक्षित प्रवास रेल्वेने करता येणे शक्य झाले आहे. डेमू गाड्यांमध्ये भरपूर जागा उपलब्ध असल्याने प्रवाशांनी या सेवेचा लाभ घ्यावा, असे आवाहन लोणंद प्रवासी संघटनेकडून केले आहे.लोणंद जंक्शनवरील उत्पन्न वाढून इतर सुपरफास्ट गाड्यांना थांबा मिळविता येणे शक्य होणार असल्याने प्रवाशांनी अन्य पर्यायी वाहतूक व्यवस्थेऐवजी शक्यतो रेल्वे सेवेचा लाभ घ्यावा. डबल लाईनचे काम ९० टक्के पूर्ण झाल्याने क्रॉसिंगला जाणारा वेळ वाचत आहे.
प्रवासी फक्त दोन ते सव्वादोन तासात लोणंद -पुणे प्रवास करू शकत आहेत, तेही फक्त ५० रुपयांत तर लोणंद-पुणे हा मासिक पास फक्त ३५५ रुपयांत मिळत असल्याने कमी पैशात जलद व सुरक्षित प्रवास उपलब्ध झाला आहे. लोणंद, निरा परिसरातील पुण्यात शिकत असलेले महाविद्यालयीन विद्यार्थी व दररोज कामानिमित्त पुणे येथे प्रवास करणारांना या सेवेचा मोठा लाभ होत आहे.