बारामती (पुणे) : बारामती तालुक्यातील ३१ ग्रामपंचायतीचे मतदान रविवारी पार पडले. या ३१ ग्रामपंचायतींचा निकाल आज जाहीर होत आहे. उपमुख्यमंत्री अजित पवार यांनी अपेक्षेप्रमाणे काटेवाडी ग्रामपंचायतीवर वर्चस्व राखलं आहे. १६ पैकी १४ जागांवर अजित पवार यांच्या गटाचे उमेदवार निवडून आले आहेत. मात्र एक हाती सत्ता असणाऱ्या या ग्रामपंचायतीवर दोन भाजप विचारांचे उमेदवार निवडून आल्याने भाजपकडून मोठा जल्लोष करण्यात आला. पहिल्यांदाच काटेवाडीत भाजपचा उमेदवार जिंकून आला, हे अधोरेखित करण्यासारखी बाब असल्याचं भाजप नेत्यांकडून सांगण्यात आले.
बारामती हा पवार कुटुंबाचा बालेकिल्ला आहे. तर काटेवाडी हे गाव पवार कुटुंबीयांच्या नावाने ओळखले जाते. गेली कित्येक वर्ष काटेवाडी ग्रामपंचायतवर पवार कुटुंबीयांचं एकहाती वर्चस्व आहे. यावेळी मात्र राष्ट्रवादीमधून बंड केलेले अजित पवार, शिंदे- फडणवीस यांच्या सत्तेत सामिल झाले. तरीही महायुतीत एकत्र असलेले शिंदे -फडणवीस आणि पवार यांच्यामध्येच काटेवाडी ग्रामपंचायत जिंकण्यावरून चुरशीची लढत पाहायला मिळालीयंदाच्या ग्रामपंचायत निवडणुकीत सरपंच पदासाठी राष्ट्रवादी बरोबरच भाजप, शिंदे गट देखील सरपंच पदासाठी नशीब आजमावत अजित पवार गटाला टक्कर देताना दिसून आले. असं असलं तरी अजित पवार गटाचे प्राबल्य जास्त असल्याने शिंदे गट आणि भाजप अजित पवार गटाच्या आव्हानासमोर टिकू शकले नसल्याचे या निकालावरून दिसून येते.
Users Today : 1