पुणे : ते दोघे व्हायोलिनिस्ट. त्यांची चार वर्षांची मुलगीसुद्धा नुकतेच व्हायोलिन शिकू लागली आहे. स्पेन येथून निघून या कुटुंबाने एक सांगीतिक जगभ्रमंती सुरू केली आहे. ऑगस्ट महिन्यात त्यांनी या प्रवासाला सुरुवात केली. प्रत्येकाच्या आयुष्यातील संगीताचे महत्त्व जगभरातील लोकांपर्यंत पोहोचवण्यासाठी ते जुलै २०२४पर्यंत हा प्रवास सुरू ठेवणार आहेत. भारतभेटीदरम्यान नुकतेच ते पुण्यात येऊन गेले. आता ते मुंबईहून थायलंडला निघाले आहेत.यॉरिक ट्रोमन, लिझबेथ बेलुस आणि त्यांची मुलगी सोल्व्हेग ‘ऑर्बिट म्युझिशियन्स वर्ल्ड टूर’वर निघाले आहेत. हे कुटुंब बेल्जियमचे आहे. स्पेन, फ्रान्स, इटली, स्लोव्हेनिया, क्रोएशिया, बोस्निया, माँटेनेग्रो, अल्बानिया, ग्रीस आणि तुर्कस्तान असे देश फिरताना या कुटुंबाने तिथले प्रादेशिक संगीत आणि लोकसंगीत सोबत घेतले. प्रत्येक पुढच्या ‘कॉन्सर्ट’मध्ये ते आधीच्या स्थळाहून गवसलेले काही स्वत:च्या पद्धतीने सादर करतात. इजिप्त, सौदी अरेबिया आणि ओमान या देशांतील थांबा त्यांना रद्द करावा लागला; कारण गाझा येथे युद्ध सुरू झाले. त्यामुळे त्यांनी त्यांची व्हॅन जहाजातून थायलंडला पाठवून दिली आणि ते तिघे स्वत: भारतात आले.
नवी दिल्ली येथे आल्यावर हे कुटुंब हृषीकेश येथे गेले. दुर्गापूजेच्या उत्सवात सहभागी झाले. तेथे त्यांनी पाच दिवस तबल्याचे धडेही घेतले. मग गोव्यातून पुण्यात आणि आता ते मुंबईला निघाले आहेत. पुण्यातील ‘सुझुकी स्कूल ऑफ व्हायोलिन’ संस्थेच्या संस्थापिका आणि संचालिका रमा चोभे यांच्या संस्थेत त्यांनी तेथील व्हायोलिनच्या विद्यार्थ्यांसह सादरीकरण केले.‘युरोपियन युनियन’चा व्हिसा असल्यामुळे आम्ही जवळपास १८० ते १९० देशांचा प्रवास करू शकतो. एका देशात असतानाच आम्ही पुढील देशाच्या ‘व्हिसा’साठीची परवानगीची प्रक्रिया सुरू करीत असल्याचे लिझबेथ यांनी सांगितले.
दौऱ्यातील विशेष काही…
– काही ठिकाणी स्वत: गाडी चालवत जाणे शक्य नाही, तेथे हे बेल्जियन कुटुंब गरजेनुसार जहाजाने गाडी पुढे पाठवते आणि स्वत: नंतर विमानाने जाते.
– हॉटेलमध्ये राहण्यापेक्षा स्थानिक व्यक्तींच्या घरी राहण्यास त्यांनी प्राधान्य दिले आहे.
– गेली २० वर्षे व्यावसायिक व्हायोलिनवादक असलेल्या या दोघांचाही युरोपमध्ये मोठा ऑर्केस्ट्रा आहेजगभ्रमंती करण्याचे माझे लहानपणापासून स्वप्न होते. बायको लिझबेथची साथ आणि तिच्या संगीतावरील प्रेमामुळेच आम्हाला हे शक्य झाले आहे. लहान वयापासूनच मुलांमध्ये संगीताची आवड निर्माण व्हावी, यासाठीसुद्धा हा दौरा आहे.- यॉरिक ट्रोमन, व्हायोलिनवादक
शाळेचा पाठिंबा
‘युरोपमध्ये शाळेत लवकर प्रवेश घेतला जातो. त्यामुळे चार वर्षांच्या सोल्व्हेगने स्पेन आणि बेल्जियम अशा दोन ठिकाणच्या शाळांत प्रवेश घेतला आहे. दोन्ही शाळांनी आमच्या सांगीतिक दौऱ्याला जोरदार पाठिंबा दिला असून, तुम्ही वर्षभराने परत याल, तेव्हा तिचा प्रवेश रद्द केलेला नसेल, याची खात्रीही शाळांनी दिली आहे. भ्रमंतीदरम्यान तिचा अभ्यासही आम्ही घेतो. दर दिवशी नव्या ठिकाणी फिरताना सोल्व्हेग नवे मित्र जोडते आहे,’ असे तिची आई आणि व्हायोलिनवादक लिझबेथ बेलुस यांनी सांगितले.
Users Today : 1