रेल्वे प्रवाशांसाठी गुड न्यूज! पुणे-कोल्हापूर विशेष रेल्वे सुरु; वाचा कुठे असणार थांबा

पुणे : पुणे-छत्रपती शाहू महाराज टर्मिनस कोल्हापूर-पुणे मार्गावर दिवाळीच्या मुहूर्तावर विशेष रेल्वे रविवारपासून सुरू झाली. पहिल्याच दिवशी या रेल्वेगाडीला प्रवाशांचा चांगला प्रतिसाद मिळाला असून, येत्या दहा ते पंधरा दिवस रेल्वेचे बुकींग चांगले असल्याचे रेल्वे प्रशासनाकडून सांगण्यात आलेमुंबई-पुणे-कोल्हापूर मार्गावर पूर्वी सह्याद्री एक्‍स्प्रेस धावत होती. करोनाकाळात ती बंद करण्यात आली. ही गाडी पुन्हा सुरू करण्याची मागणी सातत्याने केली जात आहे. खासदारांसोबत रेल्वे अधिकाऱ्यांच्या झालेल्या बैठकीतही धनंजय महाडिक यांनीही याबाबत प्रश्‍न उपस्थित करून रेल्वे सुरू करण्याच्या सूचना दिल्या होत्या. त्या वेळी रेल्वे प्रशासनाने ही रेल्वे सुरू करण्याचे आश्‍वासन दिले. त्यानुसार आता कोल्हापूर-पुणे-कोल्हापूर अशी विशेष रेल्वे सुरू करण्यात आली आहे. पाच नोव्हेंबर ते ३१ डिसेंबरदरम्यान ही विशेष रेल्वे धावणार आहे. यामुळे हजारो प्रवाशांना मोठा दिलासा मिळाला आहे.असे आहे वेळापत्रक

पुणे-कोल्हापूर रेल्वे रात्री नऊ वाजून ४५ मिनिटांनी पुण्यातून सुटेल. ती कोल्हापूर येथे पहाटे पाच वाजून ४० मिनिटांनी पोहोचेल.
कोल्हापूर-पुणे रेल्वे रात्री अकरा वाजून ३० मिनिटांनी कोल्हापूरहून सुटेल. ती पुण्यात सकाळी सात वाजून ४५ मिनिटांनी पोहोचेल.