चंद्रावरील नव्हे, अकोल्यातील हा रस्ता! दुरवस्थेवर अ‍ॅड. प्रकाश आंबेडकर यांची टीका

अकोला : ‘आश्चर्यचकित होऊ नका. हा चांद्रयान-३द्वारे काढलेला चंद्राच्या पृष्ठभागाचा फोटो नसून अकोल्यातील रस्त्यांचा आहे. आता अकोल्यात चंद्र आणण्यासाठी कोण जबाबदार आहे हे तुम्हीच ठरवायचे आहे!’ अशा शब्दांत ट्वीट करीत वंचित बहुजन आघाडीचे अध्यक्ष अॅड. प्रकाश आंबेडकर यांनी रस्त्यांच्या दुरवस्थेकडे लक्ष वेधले आहे.स्थानिक स्वराज्य संस्थेच्या निवडणुका रखडल्या आहेत. जनतेचे प्रश्न मांडण्यासाठी आणि ते सोडविण्यासाठी सभागृहात लोकप्रतिनिधी नाहीत. राज्य सरकार प्रशासकाच्या माध्यमातून कारभार हाकत आहे. यातूनच अकोल्यातील रस्त्यांची चाळणी झाली आहे. खड्ड्यांमुळे वाहन चालविताना तारेवरची कसरत करावी लागते. पायी चालणेही काही भागातून कठीण झाले आहे. अनेकदा अपघाताचा धोका संभवतो. तरीही दुर्लक्ष होत असल्याने जनतेत रोष वाढू लागला आहे. हे घडत असतानाच अॅड. आंबेडकर यांनी ट्टीट करीत रस्त्यांच्या प्रश्नांना हात घातला आहे. या ट्वीटमध्ये त्यांनी चार फोटो पोस्ट केले आहेत. यात रस्त्यावर मोठा खड्डा पडून त्यात पावसाचे पाणी साचलेले आहे. रस्त्यावरील डांबर उखडल्याने रस्त्याची चाळण झाल्याचे दिसते. सिमेंट रस्त्यांची परिस्थिती दाखविण्याचा प्रयत्नही त्यांनी केला आहे.