हिंगोलीची गुणकारी हळद पोहोचली थेट पंतप्रधानांच्या घरात; काय घडलं नेमकं?

हिंगोलीः देशातील एकूण हळद उत्पादनापैकी हिंगोली जिल्ह्यात सर्वाधिक हळदीचे उत्पादन घेतले जाते. जिल्ह्यात सेंद्रिय पद्धतीने पिकवलेली गुणकारी हळद खासदार हेमंत पाटील यांनी थेट पंतप्रधान नरेंद्र मोदी यांना भेट दिली आहे. हिंगोलीची हळद थेट पंतप्रधानाच्या स्वयंपाक घरात पोहोचल्याने हिंगोली लोकसभा मतदारसंघात सर्वत्र चर्चा होत आहे.अर्थसंकल्पीय अधिवेशनाच्या अतिशय व्यस्त कामकाजातून पंतप्रधान नरेंद्र मोदी यांनी वेळ काढत खासदार हेमंत पाटील यांना परिवारासह भेट देण्यास शुक्रवारी १७ मार्च रोजी वेळ दिला. या भेटीदरम्यान खासदार हेमंत पाटील यांनी पंतप्रधान नरेंद्र मोदी यांना हिंगोली लोकसभा मतदारसंघाच्या सर्वांगीण विकाससाठी आजवर केलेल्या विकास कार्याचा आढावा सादर केला. त्यानंतर शिरड शहापूर येथील कोचा, पुरंदर येथील संभाजी सिद्धेवार यांच्या शेतातील हळदीचा बंडा, गट्टू शेठ मुरक्या व प्रल्हाद इंगोले यांनी सेंद्रिय पद्धतीने पिकवलेल्या हळदीपासून तयार केलेल्या हळद पावडरचे विशेष गुणधर्म याबद्दल माहिती देत कोचा बंडा भेट म्हणून दिला.दरम्यान, पंतप्रधान नरेंद्र मोदी यांनी खासदार हेमंत पाटील यांच्याशी चक्क सिद्ध मराठीतून संवाद साधत हिंगोली जिल्ह्यातील वसमतच्या कनेरगाव शिवारात उभारले जात असलेल्या बाळासाहेब ठाकरे हरिद्रा हळद संशोधन व प्रक्रिया केंद्राबद्दल माहिती घेतली. हिंगोली जिल्ह्यातील हळदीला चांगले दिवस येतील आणि जिल्ह्यात हळदीचे क्लस्टर निर्मिती व हळदीवर आधारित लघु उद्योग उभे करण्यासाठी विशेष प्रयत्न केले जातील असे या भेटीदरम्यान पंतप्रधान नरेंद्र मोदी यांनी खासदार हेमंत पाटील यांना आश्वासन दिले.तसेच, हिंगोली जिल्ह्यातील वसमत येथे होणाऱ्या बाळासाहेब ठाकरे हरिद्रा हळद संशोधन व प्रशिक्षण केंद्र बाबत माहिती दिली आणि हा प्रकल्प हिंगोली सह नांदेड,यवतमाळ ,परभणी आणि संपूर्ण महाराष्ट्रातील हळद उत्पादक शेतकऱ्यांना नव संजीवनी देणारा ठरणार असून, लवकरच या केंद्राचा भूमिपूजन समारंभ आयोजित करण्यात येणार आहे. या समारंभाचे पंतप्रधान नरेंद्र मोदी यांना निमंत्रण खासदार पाटील यांनी दिले. यावेळी गोदावरी समूहाच्या अध्यक्ष राजश्री पाटील, हेमंत पाटील यांचे चिरंजीव रुद्र हेमंत पाटील, प्रितेश पाटील, मयूर मंत्री यांच्यासह आदींची उपस्थिती होती.