बुलढाणा: जिल्ह्यातील खामगाव येथे विदर्भातील प्रसिद्ध संत श्री गजानन महाराजांची वेशभूषा धारण करून त्यांच्यासारख्या अवलियाला प्रगट करण्याचा प्रयत्न करणाऱ्या व्यक्तीचा शोध लागला असून त्याची शेगाव तालुक्यातील जवळा बुदुक येथील पोलीस पाटलांनी झाडाझळती घेतल्याची माहिती मिळाली आहे. हा व्यक्ती महाराष्ट्रातील लातूर जिल्ह्याचा रहिवासी असल्याचेही विश्वसनीय माहिती मिळाली आहेमिळालेल्या माहितीनुसार, हुबेहूब श्री संत गजानन महाराजांची व्यक्तिरेखा साकारणारा व्यक्ती हा लातूर जिल्हा बँकेचा खातेधारक असल्याची माहिती मिळाली आहे. या व्यक्तीचे नाव है रामराव शेषराव बिराजदार हे असल्याचे त्याच्या खातेबुकवरून दिसून येत आहे. बिराजदार नावााच्या व्यक्तीचे खाते हे लातूर जिल्हा मध्यवर्ती सहकारी बँकेत असून त्यावर मुक्काम युग्गी (सावंगी) पोलीस स्टेशन राणी जिल्हा लातूर असा पत्ता लिहिलेला आहे. सदर व्यक्तीला दोन दिवसापूर्वी शेगाव पोलीस स्टेशन अंतर्गत येत असलेल्या जवळा बुद्रुक या गावात नागरिकांनी पकडले होते.
या गावातही त्यांनी श्री संत गजानन महाराजांचा वेष धारण करून त्यांच्यासारखाच पेहराव करून नागरिकांच्या धार्मिक भावनांना आकर्षित केले होते. ही व्यक्ती ही स्वतःच्या दुचाकीवर संपूर्ण महाराष्ट्राचा दौरा करून आली असून ती स्वतःमध्ये संत गजानन महाराजांचा वास असल्याचा आभास गावागावातील नागरिकांना करून देत आहे. काल दिनांक १ ऑक्टोंबर रोजी ही व्यक्ती खामगावातील सुटाळपूरा स्थित श्री संत गजानन महाराजांच्या मंदिर परिसरात आली होती. या ठिकाणी विविध नागरिकांनी आकर्षित होऊन त्यांना आपल्या निवासस्थानी बोलावून घेतले होते.गजाननाची हुबेहुब प्रतिकृती साकारल्यामुळे भाविकांच्या दर्शनासाठी रांगा लागल्या होत्या. ही व्यक्ती कुठून आली? तिचे नाव गाव पत्ता या संदर्भात वारंवार विचारणा होत होत्या. अखेर त्या व्यक्तीच्या कागदपत्रावरून तिचा शोध लागला आहे. सदरची व्यक्ती आज सकाळी साडेअकरा वाजताच्या सुमारास शेगाव तालुक्यातील जवळा येथून स्वतःची दुचाकी घेऊन रवाना झाली असल्याची माहिती सुद्धा मिळाली आहे. नागरिकांनी धार्मिकतेच्या आपल्या भावना जपताना किमान काळजी घेणे आवश्यक असल्याचे या गोष्टीवरून दिसून येत आहे. विशेष म्हणजे या सर्व प्रकाराला आता काय म्हणावे? याबाबतही तर्कवितर्क लावले जात आहे.
Users Today : 1