नाशिक : तंत्रस्नेही कार्यपद्धतीनुसार शासकीय कामकाजात बदल होत आहेत, त्याच स्वरूपात भ्रष्टाचारी अधिकारी-कर्मचाऱ्यांनी लाचखोरीच्या मागणीतही बदल केले आहेत. अगोदर ‘टेबलाखालून काही…’, ‘चहापाण्याचं बघा…’, ‘मलई द्यावी लागेल…’ या स्वरूपाच्या शब्दांतून होणारी लाचेची मागणी आता थेट ‘बक्षीस’ या शब्दापर्यंत पोहोचली आहे. त्यामुळे लाचलुचपत प्रतिबंधक विभागानेही (एसीबी) फिर्यादीत ‘बक्षीस स्वरूपात रक्कम मागितली अथवा स्वीकारली’, असा थेट उल्लेख करण्यास सुरुवात केली आहे.चार दिवसांपूर्वी अहमदनगर एमआयडीसीतील सहायक अभियंत्याने एक कोटी रुपयांची लाच घेतल्याने, त्याला अटक करण्यात आली. त्यासंदर्भात दाखल फिर्यादीत एसीबीतर्फे ‘संशयिताने फिर्यादी यांच्या कामाच्या बिलाचे व यापूर्वी दिलेल्या काही बिलांचे बक्षीस म्हणून एक कोटी रक्कम स्वत:सह तत्कालीन उपविभागीय अभियंत्यासाठी स्वीकारली’, असा स्पष्ट उल्लेख आहे. यापूर्वीच्याही काही गुन्ह्यांमध्ये संशयितांनी तक्रारदाराकडे ‘आमच्या कामाचे बक्षीस…’, असे म्हणत लाच मागितल्याचे समोर येत आहे. एसीबीकडे तक्रार प्राप्त झाल्यानंतर होणाऱ्या पडताळणीमध्येही ‘बक्षीस’ या शब्दाचा वापर शासकीय अधिकारी-कर्मचारी करीत असल्याचे स्पष्ट होत आहे. त्यामुळे लाचखोरांनीही त्यांच्या सांकेतिक शब्दांत वाढ केल्याचे दिसते. एसीबीनेही त्यासंदर्भातील नोंद घेत थेट फिर्यादीतच तसा उल्लेख केल्याने दोषसिद्धीसह इतर पुरावे संकलनासाठी त्याचा फायदा होण्याची शक्यता आहेत्रयस्थांचा हस्तक्षेप
शासकीय कार्यालयांमध्ये फोफावणाऱ्या भ्रष्टाचारात खासगी व्यक्तींचाही समावेश होत आहे. एखाद्या त्रसस्थ व्यक्तीच्या माध्यमातून तक्रारदाराकडे लाच मागितली जात असल्याचे एसीबी तपासात समोर येत आहे.
– सन २०२३ मध्ये एसीबीने राज्यात दाखल केलेल्या गुन्ह्यांत ९५० संशयितांपैकी १५० खासगी व्यक्ती
– वर्ग एकचे ७०, वर्ग दोनचे १२३, वर्ग तीनचे ५२०, वर्ग चारचे ३९ आणि इतर लोकसेवकांतील ९३ संशयित
– सन २०२३ मध्ये राज्यात सर्वाधिक लाचखोरीचे गुन्हे नाशिक परिक्षेत्रात दाखल
– राज्यात दाखल ७११ पैकी १४२ गुन्हे नाशिक परिक्षेत्रात नोंद, त्यामध्ये २३८ संशयित
– पुण्यात १२५, छत्रपती संभाजीनगरात ११५, ठाण्यात ९३, अमरावतीत ७३, नागपुरात ७०, नांदेडमध्ये ५७, तर मुंबईत ३६ गुन्हे दाखल आहेत.
– बहुतांश प्रकरणात ‘बक्षीस’ या शब्दाचा वापर झाल्याची एसीबी दफ्तरी नोंद
Users Today : 138