अजिंठा एक्स्प्रेस अन् १५ चोर! सिग्नल टेंपरिंग करुन ट्रेन लुटण्याचा प्लॅन; मात्र घडलं भलतंच

परभणी : मनमाडकडून सिकंदराबादकडे जाणारी अजिंठा एक्स्प्रेस सिग्नल टेंपरिंग करून थांबवून लुटण्याचा प्रयत्न चोरट्यांनी केला. मात्र, सुरक्षा यंत्रणेच्या दक्षतेमुळे हा प्रयत्न फसला. सोमवारी (२९ मे) मध्यरात्री परभणीजवळील पेडगाव रेल्वेस्थानकात हा प्रकार घडलायाबाबत अधिक माहिती अशी की, मनमाड येथून सिकंदराबादकडे दररोज धावणारी अजिंठा एक्स्प्रेस सोमवारी मध्यरात्री दोनच्या सुमारास पेडगाव रेल्वे स्थानक परिसरात आली. थांबा नसल्याने हिरवा कंदिल देऊन गाडीला पुढे सोडण्यात आले. मात्र, स्थानक सोडताच परभणीच्या दिशेकडील होम सिग्नलच्या जवळ दहा ते पंधरा अज्ञात चोरट्यांनी सिग्नल टेंपरिंग करून गाडीला सिग्नलवर रोखले. गाडीत तैनात रेल्वे सुरक्षा बलाचे सशस्त्र जवान, लोहमार्ग पोलिस तातडीने गाडी खाली उतरून सिग्नलच्या दिशेने धावले. पोलिस येत असल्याचे पाहून चोरट्यांनी पोलिसांच्या दिशेने दगड भिरकावले. परंतु, पोलिसांनी वेळीच दक्षता दाखविल्याने चोरट्यांनी पळ काढला. तासभर अजिंठा एक्स्प्रेस घटनास्थळी उभी होती. रेल्वे गाडीत कोणताही अनुचित प्रकार घडला नाही. परिस्थिती सुरळीत झाल्यानंतर गाडी परभणीच्या दिशेने रवाना करण्यात आली, अशी माहिती रेल्वे पोलिसांनी दिली. दरम्यान, नांदेड-मनमाड लोहमार्गावर सिग्नल टेंपरिंगचे प्रकार वारंवार घडत असल्याने पोलिसांची अधिक गस्त वाढविण्यात यावी, अशी मागणी रेल्वे प्रवाशांमधून होत आहे.