ना पाटील गट ना महाडिक गट कोल्हापूरमधील गावानं इतिहास रचला, गावकऱ्यांनी नवी वाट निवडत घडवलं सत्तांतर

कोल्हापूर: कोल्हापूर जिल्ह्यात ७४ ग्रामपंचायतींसाठी लागलेल्या निवडणुकीत चुरशीने मतदान झाल्यानंतर आज त्याचा निकाल हाती आला आहे. सर्वाधिक चर्चेत राहिलेली कोल्हापूर दक्षिण मतदार संघातील चिंचवाड ग्रामपंचायतीच्या निवडणुकीत आमदार सतेज पाटील आणि खासदार धनंजय महाडिक यांच्या पॅनलला सर्वसामान्य जनतेनं नाकारलं आहे. अपेक्षेप्रमाणे याही निवडणुकीत सर्वसामान्य मतदारांनी सत्ताधाऱ्यांना जोरदार धक्का देत येथे १० विरुद्ध ३ असा निकाल लावत सरपंच पदाच्या अपक्ष उमेदवार श्रद्धा प्रशांत पोतदार या तब्बल ३५ मतांनी विजयी झाल्या आहेत.
महाडिक आणि पाटील यांच्यातला राजकीय संघर्ष हा सर्वश्रुत आहे. दोघांमधील राजकीय संघर्ष हा सध्या विकोपाला गेला आहे. मात्र, दोघे कट्टर विरोधक जरी असले तरी आणि ग्रामपंचायतीच्या राजकारणात दोन्ही गटातील कार्यकर्ते एकत्र पाहायला मिळत आहेत. करवीर तालुक्यातील चिंचवाड या गावात काँग्रेस आमदार सतेज पाटील आणि भारतीय जनता पार्टीचे खासदार धनंजय महाडिक यांच्या कार्यकर्त्यांनी तयार केलेल्या पॅनलची सत्ता होती. यंदा देखील महाडिक पाटील पॅनलची सत्ता यावी यासाठी मोठ्या प्रमाणावर प्रयत्न झालेत. मात्र वारंवार तेच चेहरे आणि तीच मंडळी आणि त्यांच मंडळींच्या घरातील उमेदवार यामुळे नवीन चेहऱ्यांना संधी मिळत नसल्याने या कारभाराला कंटाळलेल्या गावकऱ्यांनी तरुणांचं अपक्ष पॅनल उभं केले.