बुलढाणा: जिल्ह्यातील स्त्री रुग्णालयात एक धक्कादायक प्रकार उघडकीस आला आहे. सहा महिन्याच्या गर्भवती महिलेला गर्भ पिशवीला टाके मारण्यासाठी भरती करण्यात आलेल्या महिलेवर गर्भपाताचे उपचार करण्यात आले आहेत. त्यामुळे या गर्भवती महिलेच्या सहा महिन्यांच्या बाळाचा दुर्दैवी मृत्यू झाला. या धक्कादायक घटनेमुळे बुलढाणा जिल्ह्यात एकच खळबळ माजली आहे. महिलेच्या नातेवाईकांनी जिल्हा शल्य चिकित्सकाकडे तक्रार करत बेजबाबदारपणे वागणाऱ्या महिला आरोग्य कर्मचारी आणि अधिकाऱ्यांवर कारवाई करण्याची मागणी केली आहे.
बुलढाण्यात राहणाऱ्या सौ. विद्या वाघ या सहा महिन्याच्या गर्भवती होत्या. त्या आपल्या चेकअपसाठी बुलढाण्यातील जिल्हा सामान्य रुग्णालयात गेल्या. त्यावेळी गर्भवती महिलेला जिल्हा स्त्री रुग्णालयातील डॉक्टरांनी तपासलं. त्यावेळी डॉक्टरांच्या लक्षात आलं की, महिलेच्या गर्भ पिशवीचं मुख उघडलं असून ते मोठं झालं आहे. त्यामुळे गर्भारपणातील पुढच्या अडचणी टाळण्यासाठी डॉक्टरांनी गर्भ पिशवीला टाके देण्याची गरज असल्याचं सांगितलं. जर टाके घातले नाहीत, तर नैसर्गिक गर्भपाताचा धोका असल्याचंही डॉक्टरांनी गर्भवती महिला आणि तिच्या नातेवाईकांना सांगितलं. डॉक्टरांच्या सल्ल्यानुसार, महिला गर्भ पिशवीला टाके देण्यासाठी रुग्णालयात दाखल झाली. अशातच गर्भवती महिलेचा गर्भपात झाला. रुग्णालयातील कर्मचाऱ्यांनी महिलेला गर्भपात होण्याची औषधं दिल्याचा आरोप महिलेच्या नातेवाईकांनी केला आहे.याप्रकरणी जिल्हा शल्य चिकित्सक सुभाष चव्हाण यांना महिलेच्या नातेवाईकांनी चांगलंच धारेवर धरलं आहे. मात्र, याबाबत डॉ.सुभाष चव्हाण यांनी माध्यमांना ही मोठी चूक असून यात चौकशी करून प्रतिक्रिया देऊ अस सांगितलं आहे. दरम्यान, या धक्कादायक प्रकारामुळे शासकीय रुग्णालयातील ढिसाळ आणि बेजबाबदारपणा उघडकीस आला आहे. रुग्णालयाचा ढिसाळ कारभार आणि बेजबाबदारपणा यामुळे महिलेपासून तिचं मातृत्त्व हिरावलं गेलं आहे. एकीकडे वैद्यकीय सुविधांकडे सरकारचे अनेक वेळा दुर्लक्ष होत आहे . यामुळे अनेक जीवघेणा घटना घडत असतानाही आरोग्य विभाग करते तरी काय, असा प्रश्न यानिमित्ताने उपस्थित झाला आहे. एका मातेने आपल्या गर्भातच बाळाला गमवल्याने तिची व्यथा काय असेल हे विचार न केलेलेच बरं. यावर सरकार समिती स्थापन करेल. कठोर कारवाईची भाषा करेल पण यावर या आरोग्य विभागाला वाटणीवर आणण्याकरता कठोर पावले उचलणे गरजेचे आहे.
Users Today : 132