बुलढाणा : डीजेच्या आवाजात सुरु असलेल्या मिरवणुकीत नाचताना कोसळून तरुणाचा मृत्यू झाल्याची घटना सहा नोव्हेंबर रोजी रात्री दहा वाजता घडली होती. बुलढाणा जिल्ह्यातील खामगाव शहरातील सतीबाई भागातील २७ वर्षीय युवकाला प्राण गमवावे लागले. मंगळवारी स्थानिक सामान्य रुग्णालयात तरुणाचे शवविच्छेदन करण्यात आले. त्यानंतर तरुणाच्या पार्थिवावर अंत्यसंस्कार करण्यात आले. त्याच्या शवविच्छेदन अहवालावरील मत तज्ज्ञांनी राखून ठेवल्याने मृत्यूचे गूढ वाढले आहे.खामगाव शहरातील सतीबाई भागातील युवराज उर्फ नटवर सुरेश यादव या युवकाला सोमवारी रात्री मिरवणुकीत नाचताना अस्वस्थ वाटू लागले. भोवळ येऊन कोसळल्यानंतर सहकाऱ्यांनी त्याला तातडीने वैद्यकीय मदत मिळवून देण्यासाठी धावपळ केली. परंतु त्यांचे प्रयत्न निष्फळ ठरले. कारण तोपर्यंत तरुणाचा मृत्यू झाला होता. त्यानंतर युवकाचा मृतदेह सामान्य रुग्णालयात नेण्यात आला. निर्मल टर्निंग मोठ्या पुलावर घडलेल्या या घटनेमुळे खामगाव शहरात एकच खळबळ उडाली.
मंगळवारी खामगाव येथील सामान्य रुग्णालयात युवकाचे शवविच्छेदन करण्यात आले. त्याचा विसेरा प्रयोगशाळेत तपासणीसाठी पाठविण्यात आला आहे. डॉक्टरांनी अहवाल राखून ठेवला आहे. त्यामुळे या युवकाचा मृत्यूचे गूढ वाढले आहे.
काहींना रातआंधळेपणाचा त्रास
सोमवारी पार पडलेल्या विसर्जन मिरवणुकीमध्ये डीजेवर वापरण्यात आलेल्या लेझर किरणांमुळे काही जणांना सोमवारी रातआंधळेपणाचा त्रास झाला. यापूर्वी नवदुर्गा विसर्जन मिरवणुकीतही चार ते पाच युवक अशाच प्रकारच्या त्रासाने ग्रस्त होऊन उपचारासाठी आल्याची खामगावात चर्चा आहे
युवकाचा मृत्यू, तर अनेकांना भोवळ
डीजेच्या कर्णकर्कश्श आवाजामुळे घटनास्थळीच युवकाचा मृत्यू झाल्याचा संशय व्यक्त होत आहे. दरम्यान या काळात अनेकांना भोवळ आल्याचा दावाही परिसरात केला जात आहे. तर काही जणांना कानठळ्या बसल्याचीही प्रकरणे समोर येत आहेत.
व्यावसायिकांचे जिल्हा पोलीस अधीक्षकांना निवेदन
खामगाव शहरात डीजेमुळे ध्वनी प्रदूषणात वाढ झाल्याचे निवेदन मुख्य रस्त्यावरील व्यावसायिकांनी दिनांक ७ नोव्हेंबर रोजी दिले. या निवेदनावर मुख्य रस्त्यावरील विविध प्रतिष्ठानच्या संचालकांच्या स्वाक्षऱ्या आहेत.
Users Today : 104