भावाच्या मृत्यूचा धक्का: अंत्यसंस्काराला गेलेल्या बहिणीने मृत भावाच्या मांडीवरच प्राण सोडले

हिंगोली : वयोवृद्ध मोठ्या भावाचे निधन झाल्याची दुःखद बातमी कळाल्याने अर्धापूर येथे अंत्यविधीसाठी गेलेल्या बहिणीला भावाचा मृतदेह पाहताच मोठा धक्का बसला व त्यात बहिणीचे निधन झाल्याची घटना घडली आहे. या हृदयद्रावक घटनेने दोन्ही कुटुंबावर दुःखाचा डोंगर कोसळला. एकाच दिवशी बहीण-भावाचा मृत्यू झाल्याने सर्वत्र हळहळ व्यक्त केली जात आहे.याबाबतची अधिक माहिती अशी की, हिंगोली जिल्ह्यातील वसमत तालुक्यातील कोर्टा येथील रहिवासी असलेल्या मथुराबाई संभाजी बोरकर (७०) यांचे मोठे भाऊ नामदेवराव साखरे (८०) यांचे अर्धापूर येथे वृद्धापकाळाने मंगळवारी निधन झाले. भावाच्या अंत्यसंस्कारासाठी मथुराबाई अर्धापूर येथे गेल्या होत्या. तेथे भावाचा मृतदेह पाहताच त्यांना धक्का बसला व या धक्क्यातून त्या सावरल्याच नाहीत. मथुराबाई यांनीही जागीच प्राण सोडले.भावाच्या अंत्यसंस्कारासाठी आलेल्या बहिणीचेही निधन झाल्याच्या घटनेने आप्तस्वकीय व नातलगांवर दुःखाचा डोंगर कोसळला. मयत मथुराबाई बोरकर यांचा मृतदेह अर्धापूर येथून कोर्टा येथे आणण्यात आला व त्यांच्यावर १५ मार्च रोजी सायंकाळी अंत्यसंस्कार करण्यात आले. अर्धापूर येथे भावावर तर वसमत तालुक्यातील कोर्टा येथे बहिणीवर एकाच दिवशी अंत्यसंस्कार झाले.आयुष्याच्या उत्तरार्धातही नामदेवराव आणि मथुराबाई या भावा-बहिणीतील प्रेमाचा ओलावा कायम होता. आपल्या प्रिय भावाचे निधन झाल्याचा धक्का बहिणीला सहन झाला नाही. त्यातूनच ही घटना घडली असल्याचे बोलले जात आहे. मयत नामदेवराव साखरे यांना दोन भाऊ व एक बहीण होती. तीन भावात एक बहीण असल्याने मथुराबाई सर्वांची लाडकी होती. काही दिवसांपूर्वी नामदेवराव साखरे हे आजारी असल्याचे समजल्यामुळे मथुराबाई या अर्धापूर येथे जाऊन आजारी भावाची भेट घेऊन आल्या होत्या. त्यावेळी त्यांनी भावाला तब्येतीची काळजी घे, नंतर भेटू असे सांगितले होते. मात्र आता या दोघांवरही काळाने झडप घातली आहे.