अकोला : मनोज जरांगे पाटील यांच्या मराठा आंदोलनाच्या समर्थनात अकोल्यात गुरुवारी लोकप्रतिनिधींच्या निवासस्थानांपुढे आत्मक्लेश आंदोलन करण्यात आले. पण, कुठल्याही राजकीय पक्षाच्या पदाधिकाऱ्यांकडून आपण निवेदन स्वीकारणार नाही, अशी भूमिका शिवसेना (ठाकरे गट) आमदार नितीन देशमुख यांनी घेतली. यावरून आंदोलक आणि आ. देशमुख यांच्यात वाद झाल्याने काही काळ तणाव निर्माण झाला होता. दुसरीकडे शिवसेनेच्या शिंदे गटाचे आमदार विप्लव बाजोरिया आणि भाजपचे आमदार वसंत खंडेलवाल यांनी आंदोलकांचा सामना करण्याचे टाळले.गरजवंत सकल मराठा क्रांती मोर्चातर्फे लोकप्रतिनिधींच्या घरासमोर आंदोलन करण्यासाठी सकाळपासून मराठा समाजबांधव एकत्र होऊ लागले. जिल्हा परिषद कर्मचारी भवनापासून आंदोलनाला सुरुवात झाली. सर्वप्रथम आमदार रणधीर सावरकर यांच्या घरी आंदोलक पोहोचले. आमदार सावरकर घरी नसल्याने त्यांच्या वडिलांनी निवेदन स्वीकारले. त्यानंतर आमदार नितीन देशमुख यांच्या घरी आंदोलक पोहोचले. आमदार देशमुख यांनी, ‘मी कोणत्याही राजकीय पक्षाच्या पदाधिकाऱ्यांच्या हस्ते निवेदन घेणार नाही’, अशी भूमिका घेतली. त्यामुळे वंचित बहुजन आघाडीचे राज्य प्रवक्ता डॉ. धैर्यवर्धन फुंडकर व आमदार देशमुख या दोघांमध्ये वाद झाला. कुणीही पक्षाचा नाही तर मराठा समाजबांधव म्हणून आला असल्याचे स्पष्ट करण्यात आल्यानंतर हा वाद निवळला. यानंतर आमदार अमोल मिटकरी यांनी आंदोलकांची भेट घेऊन निवेदन स्वीकारले.आंदोलक व पोलिसांमध्ये वाद
आमदार वसंत खंडेलवाल यांनी आंदोलकांची भेट घेण्याचे नाकारले. त्यावेळी ते घरीच होते, असा दावा आंदोलकांनी केला. आमदारांना आधीच कल्पना असूनही त्यांनी निवेदन स्वीकारण्याचे जाणीवपूर्वक टाळल्याचा आरोप आंदोलकांनी करीत तीव्र निदर्शने केली. त्यांच्याविरुद्ध घोषणा दिल्यामुळे पोलिसांनी त्यांना मज्जाव केला. यावरून आंदोलक आणि पोलिसांमध्ये वाद झाला. आंदोलक आक्रमक झाल्याचे बघून पोलिसांनाही नमते घ्यावे लागले होते.
मंगरुळपीरमध्ये लाक्षणिक उपोषण
वाशीम : जरांगे पाटील यांच्या आंदोलनाच्या समर्थनात मंगरुळपीर येथील छत्रपती शिवाजी महाराज चौकात सकल मराठा समाजाच्यावतीने लाक्षणिक उपोषण करण्यात आले. या उपोषणाला तालुक्यासह समाजातील नागरिकांचा मोठ्या प्रमाणावर प्रतिसाद मिळाला. या उपोषणामध्ये शिवराज मित्रमंडळ, राम ठाकरे मित्रमंडळ, गुरूध्वज मित्रमंडळ यांनी पाठिंबा देऊन आपला सहभाग नोंदविला. उपोषणाची दखल घेत तहसीलदार शीतल बंडगर, ठाणेदार सुधाकर आढे यांनी भेट दिली.
सरकारला कर्णयंत्र भेट
बुलढाणा : मराठा समाजाच्या मागण्यांकडे दुर्लक्ष केले जात असल्याचा आरोप करीत खामगाव येथील सकल मराठा समाजाच्यावतीने गुरुवारी मोर्चा काढण्यात आला. यानंतर उपविभागीय महसूल अधिकाऱ्यांमार्फत पंतप्रधान नरेंद्र मोदी, मुख्यमंत्री एकनाथ शिंदे व दोन्ही उपमुख्यमंत्र्यांना उच्च दर्जाचे कर्णयंत्र आणि चष्मा भेट देऊन मराठा समाजाच्या व्यथा समजून घेऊन तातडीने आरक्षण द्यावे, अशी मागणी केली.
बुलढाणा : मनोज जरांगे यांच्यावर टीका करण्यासोबतच ॲड. गुणवंत सदावर्ते हे मराठा आरक्षणाला विरोध करीत असल्याचा आरोप करीत सकल मराठा समाजाच्यावतीने जिल्हाधिकारी कार्यालयासमोर घोषणाबाजी करण्यात आली.
Users Today : 74