तरुणीच्या इच्छेविरुद्ध प्रस्थापित केले शारीरिक संबंध, दुर्लक्ष झालं अन्…; अमरावतीत खळबळ.

अमरावती : राज्यात महिला अत्याचाराच्या घटना मोठ्या प्रमाणात वाढत असताना आता अमरावती शहरामध्ये एक धक्कादायक प्रकार समोर आला आहे. लग्नाचे आमिष दाखवून एका तरुणीवर अत्याचार करण्यात आला. त्यातून तिला गर्भधारणा झाली. ही घटना गाडगेनगर ठाण्याच्या हद्दीत उघडकीस आली. या प्रकरणी आरोपीविरुद्ध गुन्हा दाखल करण्यात आला आहे.मिळालेल्या माहितीनुसार, शुभम बाबाराव खडसे ( २० ) असे गुन्हा दाखल करण्यात आलेल्या आरोपीचे नाव आहे. शुभम हा पीडित १८ वर्षीय तरुणीच्या परिचयातील आहे. दोघांमध्ये बोलचालसुद्धा होती. दरम्यान, शुभमने पीडित तरुणीला लग्नाचे आमिष दाखवून आपल्या घरी बोलाविले. त्यानुसार पीडित तरुणी ही शुभमच्या घरी गेली. त्यावेळी शुभमने पीडित तरुणीच्या इच्छेविरुद्ध तिच्यासोबत शारीरिक संबंध प्रस्थापित केले. त्यातून तिला गर्भधारणा झाली. मात्र, भीतीपोटी तिने याबाबत आपल्या आईला काहीही सांगितले नाही.तिने याबाबत शुभमला माहिती दिली. मात्र, त्याने त्याकडे दुर्लक्ष केले. दरम्यान, पीडित तरुणीच्या आईला संशय आल्याने त्यांनी तिला याबाबत विचारणा केली. त्यावेळी तिने आपबिती आईकडे कथन केली. त्यानंतर आईने तिला शहरातील एका रुग्णालयात दाखल केले. रुग्णालय प्रशासनाने याबाबत माहिती दिल्यावर गाडगेनगर पोलिसांनी पीडित तरुणीचे बयान नोंदविले. तिच्या बयानावरून आरोपी शुभमविरुद्ध बलात्काराचा गुन्हा दाखल करण्यात आला.