जळगाव : जळगाव शहरातून नांदगावकडे जात असलेल्या धावत्या बसमध्ये विद्यार्थिनींची छेडखानी केल्याचा प्रकार घडला. या प्रकारानंतर प्रवासी तसेच चालकाने तरुणाला हटकले असता, त्याने थेट सर्वांना चॉपरचा धाक दाखवला. त्यानंतर भितीने काही अंतरावर धावत्या बसचा दरवाजा उघडून बसमधून उडी मारल्याचा धक्कादायक प्रकार समोर आला आहे. या प्रकारानंतर बस थेट पोलीस ठाण्यात नेण्यात येऊन विद्यार्थिनीची छेड काढणाऱ्या तरुणाविरोधात तालुका पोलीस ठाण्यात गुन्हा दाखल करण्यात आला आहे.जळगाव शहरातील नवीन बसस्थानकाहून (एम.एच.८० वाय ५१९३) जळगाव – नांदगाव ही बस निघाली. दुपारची दीड वाजेची बस न गेल्यामुळे या बसमध्ये नांदगाव, कानळदा, नांद्रा, फेसर्डी या भागातील विद्यार्थी-विद्यार्थिनींची संख्या मोठ्या प्रमाणात होती. तर इतर प्रवाशांचीही संख्या मोठी असल्याने बस प्रवाशांच्या गर्दीने फुल्ल भरली होती. बस दुपारी ३ वाजता आव्हाणे फाट्याच्या पुढे गेल्यानंतर बसमधील एका टवाळखोराने इतरांच्या साथीने बसमधील विद्यार्थिनींची छेड काढण्याचा प्रयत्न केला.विद्यार्थिनींनी वाहकाकडे तक्रार केल्यानंतर वाहक लोटन पाटील यांनी संबधित टवाळखोराला समजावण्याचा प्रयत्न केला. मात्र, तरीही संबधित टवाळखोराने बसमधील वाहन तसेच प्रवाशांना चॉपरचा धाक दाखवत बसमध्ये गोंधळ घालून, विद्यार्थिनींसमोर चित्र-विचित्र हावभाव करून छेडखानी करण्याचा प्रयत्न सुरु होताच. त्यानंतर बस नांद्रा फाट्यावर आली असताना, विद्यार्थिनींना होणारा त्रास वाढल्याने, वाहक लोटन पाटील यांनी चालक तुकाराम रायसिंग यांना बस थेट तालुका पोलीस स्टेशनमध्ये नेण्याच्या सूचना दिल्या.
नांद्रा गाव केवळ १ किमीवर असताना चालकाने बस गावात न नेता थेट जळगावकडे पुन्हा फिरवली. यामुळे पोलिसांच्या भितीने घाबरलेल्या टवाळखोर युवकाने बस थांबविण्याची विनंती केली. मात्र, चालकाने बस न थांबवता तालुका पोलीस स्टेशनकडे नेली. बस थांबणार नाही, हे कळल्यामुळे संबधित युवकाने पोलिसांकडे नाव सांगणाऱ्यांना थेट चॉपर दाखवून धमकी दिली. त्यातच आव्हाणे फाट्याजवळ युवकाने चालत्या बसचा दरवाजा उघडून उडी मारून त्याठिकाणाहून पसार झाला. मात्र, चालकाने तरीही बस तालुका पोलीस स्टेशनला आणली. या प्रकरणी विद्यार्थिनी, चालकाने दिलेल्या फिर्यादीनुसार त्या युवकाविरोधात गुन्हा दाखल करण्यात आला आहे. पुढील तपास लोखंडे करत आहेत.
Users Today : 74