तूर कापसाच्या पिकांच्या आड शेतकऱ्याचा वेगळाच उद्योग, LCB ला माहिती मिळाली अन् कोट्यवधींचा मुद्देमाल जप्त

धुळे : राज्यात गांजा शेतीवर बंदी घालण्यात आलेली आहे. मात्र, काही शेतकऱ्याकंडून गांजाच्या रोपांची लागवड करण्यात येत असल्याच्या घटना समोर आलेल्या आहेत. पोलिसांकडून अशा शेतकऱ्यांवर कारवाई देखील करण्यात येते. धुळे जिल्ह्यात देखील अशाच प्रकारची कारवाई पोलिसांनी केली आहे. शिरपूर तालुक्यातील लाकड्या हनुमान गावातील एका शेतात स्थानिक गुन्हे शाखेने तब्बल तीन कोटी रुपयांच्या किमतीचं गांजाचं पीक असल्याची माहिती पोलिसांना मिळाली होती. स्थानिक गुन्हे शाखेच्या पथकातील पोलिसांनी ही माहिती समजताच सदर शेतावर छापा मारुन सदर गांजा जप्त केला आहे. ज्या शेतात गांजा लागवड करण्यात आली होती तो शेतमालक फरार झाला आहे.शिरपूर तालुक्यातील लाकड्या हनुमान येथे देवा कहारु पावरा या शेतकऱ्याने त्याच्या शेतात गुंगीकारक औषधे तसेच मनोव्यापारावर परिणाम करणारे गांजा पिकाची शेतात लागवड केल्याची माहिती एलसीबी पथकाला मिळाल्याच्या आधारे ही कारवाई केली आहे.
धुळे स्थानिक गुन्हे शाखेच्या पोलिसांनी सदर शेतावर छापा टाकला असता त्यांना गांजा झाडांचे तीस किलो वजनाचे १९९ गठ्ठे व ३२ किलो वजनाचा एकूण ३ कोटी १० हजार रुपयांचा गांजा आढळून आला. सदर गांजा पोलिसांनी जप्त केला असून वरील शेतकऱ्याविरुद्ध एलसीबीचे पो. कॉ. महेंद्र सपकाळ यांनी शिरपूर पोलिसात तक्रार दिली असून पुढील तपास पीएसआय संदीप पाटील करीत आहेत. या घटनेतील आरोपी फरार झाला आहे.शिरपूर तालुक्यातील लाकड्या हनुमान परिसरात सर्रासपणे कापूस तूर अशा विविध प्रकारच्या पिकांच्या अडून मोठ्या प्रमाणात गांजाची शेती करण्यात येत असते. मात्र पोलीस देखील अनेकदा कारवाई करतात मात्र, गुप्तता पाळून काही शेतकरी लागवड करत असल्याचं चित्र आहे. शिरपूर तालुका त्यातील लाकड्या हनुमान परिसर म्हणजे गांजाच्या शेतीसाठी बालेकिल्ला असल्याचे मानले जाते. सध्या पोलिसांनी या परिसरात खडक पहारा देत अनेकदा मोठ्या कारवाया या परिसरात केल्या आहेत. आता नुकताच तब्बल तीन कोटी रुपयांचा मुद्देमाल धुळे स्थानिक गुन्हे शाखेचे पोलीस निरीक्षक दत्तात्रय शिंदे यांच्या मार्गदर्शनाखाली पकडला आहे. दत्तात्रय शिंदे यांच्या पथकाने ही मोठी कामगिरी केल्याने पोलीस अधीक्षकांनी संबंधित पोलीस पथकाला तब्बल वीस हजार रुपयांचं बक्षीस जाहीर केलं आहे.