आली दिवाळी आली दिवाळी! आसमंत उजळला; बाजारपेठा सजल्या, दिवाळीच्या खरेदीसाठी नागरिकांची गर्दी

मुंबईच्या बाजारांमध्ये कंदील, फटाके दिसू लागले की दिवाळीची चाहूल लागते. वेळोवेळी ऑनलाइन शॉपिंग करणारा, वर्षभर काही ना काही खरेदी करणारा मुंबईकर दिवाळीत फारशी खरेदी करायची नाही असे ठरवूनही तो निश्चय पाळू शकत नाही. कधी रस्त्यावर सजलेले रंगांचे ढीग त्याला खुणावतात, तर कधी झाडांवर, फूटपाथवरच्या स्टँडवर दिमाखाने लटकणारे कंदील. पारंपरिक आकाशकंदिलापासून, चांदण्या, पैठणी, ज्युट, खण या कापडांचा वापर करून बनवलेले आकाशकंदील मुंबईकरांना मोहवत आहे. पूर्वी घराच्या गॅलरीत किंवा वऱ्हांड्यात दिसणाऱ्या एकाच कंदिलाने आता प्रत्येक खोलीसाठी एक कंदील अशी व्यापक जागा मिळवली आहे. याशिवाय विविध आकारांची, विविध रंगांची तोरणेही घरोघरी सजू लागली आहेत. गेल्या आठवडा अखेरीसच अनेक घरांमध्ये तोरणे आणि आकाशकंदील लावून दिवाळीच्या वातावरणाची जाणीव करून दिली गेली.

गल्ल्यागल्ल्यांमध्ये लागलेली फटाक्यांची दुकाने, फराळांचे लहान स्टॉल लहान-लहान खरेदीसाठी मुंबईकरांना खुणावत आहेत. चिवडा, चकल्यांपासून अनारसे, चिरोटे यांसारखे पदार्थही उपलब्ध आहेत. घरामध्ये दोन प्रकारचे लाडू करून इतर पदार्थ बाहेरून मागवण्याकडे नोकरदार वर्गाचा कल वाढत असल्याने दिवाळीच्या निमित्ताने अनेक हातांना रोजगारही मिळाला आहे. लहानशा टोपल्यांमध्ये रंगवलेल्या पणत्या घेऊन फिरणारी लहान मुले, बॅटरीवर पेटणारे दिवे, इलेक्ट्रिक पणत्या यांनीही बाजार उजळून गेले आहेत. यातून मिळणाऱ्या उत्पन्नावर अनेकांच्या घरात दिवाळी साजरी होणार आहे.बुधवारी ढगाळलेल्या आभाळामुळे मुंबईमध्ये उकाड्याची तीव्र जाणीव होत होती. मात्र या उकाड्याचा आणि संध्याकाळी पडलेल्या हलक्या सरींचा परिणाम मुंबईच्या खरेदीच्या उत्साहावर झाला नाही. दादर, लालबाग, क्रॉफर्ड मार्केट येथे खरेदीसाठी ग्राहकांची मोठी गर्दी होती. शॉपिंग मॉलमध्येही ब्रॅण्डेड कपड्यांच्या खरेदीसाठी मुंबईकर पोहोचले होते. दिवाळीच्या निमित्ताने यंदा बाजारात मोठी उलाढाल होत असल्याचे चित्र आहे. लक्ष्मीपूजनाच्या दिवशी या उलाढालीला जराशी विश्रांती मिळेल. मात्र त्यानंतर पुन्हा एकदा दिवाळीचा पाडवा, भाऊबीज या दोन्ही दिवशी खरेदीच्या उत्साहाला पुन्हा उधाण येईल.