महिलेची चिमुकल्यासह विहिरीत उडी; तरुण मदतीला धावला, अन् गाव हळहळलं, तिघांवर एकाचवेळी अंत्यसंस्कार

बुलढाणा: एकीकडे दिवाळी काही दिवसांवर येऊन ठेवली असताना सर्वत्र उत्साहाचे वातावरण आहे. मात्र बुलढाणा जिल्ह्यातील भरोसा या गावात एक मोठी दुर्दैवी घटना समोर आली आहे. एका मातेने आत्महत्या केली आहे. दिवाळसणामुळे सर्वत्र नवचैतन्याचे वातावरण असतानाच तालुक्यातील भरोसा या गावासाठी ६ नोव्हेंबरची रात्र काळरात्र बनून आली. एका २६ वर्षीय विवाहितेने अवघ्या २१ महिन्यांच्या चिमुकल्यासह विहिरीत उडी घेऊन आत्महत्या केली. या मायलेकांना वाचविण्यासाठी विहिरीत उडी मारलेल्या तरूणाचाही गाळात फसल्याने मृत्यू झाला. या घटनेतील तिघांच्या पार्थिवावर अंत्यसंस्कार करताना सर्व गावकरी हळहळले.मिळालेल्या माहितीनुसार, भरोसा येथील विवाहिता शितल गणेश थुट्टे हिने अवघ्या २१ महिन्यांचा देवांश या चिमुकल्यासह गावातील शेतकरी दिनकर जाधव यांच्या मालकीच्या विहिरीत ६ नोव्हेंबरच्या सायंकाळी ५ ते ६ वाजेच्या सुमारास उडी घेऊन आत्महत्या केली. शितल हिने चिमुकल्यासह विहिरीत उडी घेतल्याचे समजताच त्यांच्या वाचविण्यासाठी गावातील सिध्दार्थ निंबाजी शिरसाठ (३६) यांनी विहिरीत उडी घेतली. मात्र सिध्दार्थ यांचे पाय गाळात फसल्याने त्यांचाही करूण अंत झाला. सिद्धार्थ शिरसाट हे पट्टीचे पोहणारे होते. परंतू, संध्याकाळची वेळ असल्याने विहिरीत अंधार होता. शिवाय विहिरीतील गाळ असेल याची त्यांना कल्पना नसल्याने त्यांचाही घात झाला.दरम्यान गावातीलच सुखदेव त्र्यंबक थुट्टे (५५) यांनी विहिरीत उडी घेतली होती. सुदैवाने काठावरील ग्रामस्थांनी तातडीने विहिरीत दोर सोडून त्यांना सुखरूप बाहेर काढले. माहिती मिळताच अंढेरा पोलीस निरीक्षक विकास पाटील यांनी सहकाऱ्यांसह घटनास्थळी धाव घेतली. रात्रीचा अंधार आणि विहिरीत गाळ असल्याने मृतदेह काढणे जिकरीचे ठरले होते. ७ नोव्हेंबरच्या पहाटे हे तीनही मृतदेह बाहेर काढल्यानंतर तिघांचे मृतदेह उत्तरीय तपासणीसाठी चिखली ग्रामीण रुग्णालयात आणण्यात आले होते. दुपारी भरोसा येथेही तीनही मृतदेहांवर शोकाकुल वातावरणात अंत्यसंस्कार करण्यात आले.