माझा आनंद गेला; नोकरीचा प्रवास सुरु होण्यापूर्वीच आयुष्याचा प्रवास संपला, आई-बापाचा हंबरडा

अकोट शहरापासून ८ किमीवरील असलेलं बोर्डी गाव. तेथील रहिवासी असलेला आनंद सुभाष खांदेल (वय २२) हा अत्यंत हुशार आणि होतकरू मुलगा होता. वडील शेती करीत असल्यानं त्याच्यावरच कुटुंबाचा संपूर्ण भार असणार होता. अमरावती शहरातून नुकतेच त्याने इंजिनिअरिंग शाखेतून शिक्षण पूर्ण केले. पहिल्याच झटक्यात पुण्यात नोकरीच्या मुलाखतीत त्याची निवड झाली. नोकरी लागल्याने २ महिन्यानंतर जॉईन होण्यासाठी पुण्यात जाणार होता. परंतु काल त्याआधी आनंद हा अमरावतीतील इंजिनिअर महाविद्यालयातून डिग्री आणण्यासाठी निघाला होता, आणि सायंकाळच्या सुमारास डिग्री घेऊन परत गावाकडे येत असताना गावाच्या हाकेच्या अंतरावर आनंदसोबत एक दुर्दैवी घटना घडली. या घटनेत खांदेल कुटुंबियांचे स्वप्न भंगले.बोर्डी आणि अकोट रस्त्यावरील नगापुर गावच्या अर्धा किमी पुढे संत्रा वाहून नेणारा ट्रॅक्टर आणि आनंदच्या दुचाकीमध्ये अपघात झाला. या अपघातात तो गंभीर जखमी झाला. स्थानिक नागरिकांनी आणि त्याच्या मित्रांनी त्याला तातडीने उपचारासाठी अकोटच्या ग्रामीण रुग्णालयात दाखल केलं. मात्र, त्याची प्रकृती चिंताजनक असल्याने त्याला पुढील उपचारासाठी अकोल्यात हलवण्यात आलं. परंतु इथे डॉक्टरांनी त्याला मृत घोषित दाखवलं. ही घटना काल ८ नोव्हेंबर रोजी रात्री सात साडेसात वाजताच्या सुमारास घडली आहे. दरम्यान, अपघातानंतर ट्रॅक्टर चालक आणि ट्रॅक्टर यातील मजूर घटनास्थळावरून पसार झाले. सद्यस्थितीत या प्रकरणात आकोट ग्रामीण पोलीस ठाण्यात अपघाताची नोंद करण्यात आली असून पुढील कारवाई सुरू आहे. अशी माहिती आकोट ग्रामीण पोलीस स्टेशनचे पोलीस निरीक्षक संजय खंदारेंनी दिली आहे.

दिवाळी तोंडावर आहे आणि हा सण सर्वांसाठी उजाळा घेऊन येणारा हा असतो. परंतु कालची तारीख हे खांदले कुटुंबासाठी दुःखदायक ठरली आहे. आनंदच्या मृत्यूची बातमी कुटुंबियांना पोहोचतात त्यांना धक्का बसला. त्याच्या पश्चात आई वडील, तीन बहिणी आहेत. आई वडिलांचा आधार होऊन नोकरीतून त्यांना सुखी ठेवण्याचं स्वप्न उराशी बाळगून ठेवणारा आनंद याचा हा कालचा अखेरचा प्रवास ठरला. तो राहत असलेल्या परिसरात सर्वांकडूनच त्याच्या गुणवत्तेची प्रशंसा होत असून त्याच्या अपघाती जाण्याने सर्वत्र हळहळ व्यक्त होत आहे