मुंबई : ‘माझा जन्म श्रीराम आणि सीता यांच्या देशात झाला आहे. मी राम आणि सीता यांना फक्त हिंदूंचा वारसा समजत नाही; या देशातील प्रत्येक व्यक्तीची ती संपत्ती आहे. राम आणि सीता हे या देशातील सर्व नागरिकांचे दैवत आहेत. रामायण ही आपली सांस्कृतिक मालमत्ता आहे’, असे प्रतिपादन ज्येष्ठ गीतकार जावेद अख्तर यांनी गुरुवारी मनसेच्या दीपोत्सवाच्या उद्घाटन प्रसंगी केले.मनसेतर्फे दरवर्षी प्रमाणे यंदाही छत्रपती शिवाजी महाराज मैदान (शिवाजी पार्क) येथे दीपोत्सव २०२३चे आयोजन करण्यात आले आहे. या दीपोत्सवाचे उद्घाटन सलीम-जावेद यांच्या हस्ते गुरुवारी झाले. त्यावेळी जावेद अख्तर यांनी वरील प्रतिपादन केले.
‘गोष्टी स्पष्टपणे बोलल्या पाहिजे. उघड बोलले पाहिजे. तेव्हाच मजा येते. या मंचावर आम्हाला पाहून काही लोकांना आश्चर्य वाटले असेल. राज ठाकरेंना सलीम-जावेदच्या शिवाय दुसरे कोणी मिळाले नाही का, असेही अनेकांना वाटेल. स्वत:ला नास्तिक समजणारे जावेद अख्तर या मंचावर कसे, असेही अनेकांना वाटले असेल’, असे जावेद यांनी मिश्कीलपणे नमूद केले. आणि लगेचच, ‘राज ठाकरे हे आमचे परममित्र असून राज ठाकरेंनी शत्रूला जरी आमंत्रण दिले तरी तो नाकारणार नाही… आम्ही तर मित्रच आहोत’, अशी पुस्ती त्यांनी जोडली.
‘त्यावेळी मी गर्भगळीत झालो’
‘स्वदेस’ चित्रपटाची एक आठवण जावेद यांनी यावेळी सांगितली. ‘चित्रपटासाठी उद्याच गाणे हवे आहे आणि उद्याच या गाण्याचे शुटिंग करायचे असल्याचे मला स्वदेसच्या वेळी सांगण्यात आले. मला गाणे लिहायला साधारण दीड तास लागतो. त्यामुळे मी होकार दिला. पण मला रामायणाच्या एका प्रसंगावर गाणे लिहायला सांगितल्याने मी गर्भगळीतच झालो. मी तसा नास्तिक. त्यामुळे काय लिहू असा प्रश्न पडला. मी दिग्दर्शकाला म्हणालो तुम्ही तर माझ्या खुनाचीच पुरेपूर तयारी केली आहे’, असे जावेद म्हणाले.
Users Today : 28