काँग्रेसची नागपूर मनपावर धडक, समस्या सोडवा म्हणत घातला आयुक्तांना घेराव

 नागपूर: अतिक्रमणामुळे शहरातील अनेक रस्ते अरुंद झाले आहेत. गरज नसलेल्या मार्गांवर डांबरीकरण केले जात आहे; तर झोपडपट्ट्यांमध्ये रस्त्यांची दुर्दशा असताना काँक्रिट किंवा डांबरीकरणाकडे लक्ष दिले जात नाही. विविध समस्यांमुळे ऐन सणासुदीच्या दिवसात सर्वसामान्य त्रस्त असताना प्रशासन सुस्त असल्याचा आरोप करीत काँग्रेसचे शहराध्यक्ष आमदार विकास ठाकरे यांच्या नेतृत्वात गुरुवारी महापालिकेवर धडक देण्यात आली. यावेळी शहरातील विविध मागण्यांकडे लक्ष वेधत पदाधिकारी व कार्यकर्त्यांनी महापालिका आयुक्त डॉ. अभिजित चौधरी यांना घेराव केला.महापालिकेवर गेल्या दीड वर्षापासून प्रशासक असल्याने नागरिकांशी संबंधीत विविध समस्यांकडे दुर्लक्ष केले जात आहे. आम्ही जनतेचे सेवक आहोत. त्यामुळे नागरिकांच्या समस्या सोडवणे आमचे काम आहे. शहरातील कचरा उचलणाऱ्या एजी एन्व्हॉयरो व बीव्हीजीच्या कार्यपद्धतीत कोणतीही सुधारणा नाही. विविध ठिकाणी कचऱ्याचे ढिगारे लागलेले असतात. परिणामी नागरिकांचे आरोग्य धोक्यात आले. याकडे तातडीने लक्ष दिल्यास शहरातील कचरा उचलून महापालिकेत टाकण्यात येईल, असा इशारा विकास ठाकरे यांनी दिला. दोन्ही कंपन्यांकडून मोठ्या प्रमाणात भ्रष्टाचार सुरू असल्याने त्यांचे कंत्राट रद्द करावे, अशी मागणीही त्यांनी केली. पेयजल पाइपलाइनसाठी नव्याने बांधलेले रस्ते खोदण्यात आले, अनियमित पाणीपुरवठा व इतर समस्यांकडे लक्ष वेधण्यात आले.

शिष्टमंडळात काँग्रेसच्या सोशल मीडियाचे प्रदेशाध्यक्ष विशाल मुत्तेमवार, संजय महाकाळकर, दिनेश बानाबाकोडे, पुरुषोत्तम हजारे, नरेश गावंडे, रमण पैगवार, गुड्डू तिवारी, रमेश पुणेकर, नितीन साठवने, मनोज साबळे, भावना लोणारे, गजराज हटेवार, वसीम खान, स्नेहा निकोसे, विवेक निकोसे, मिलिंद दुपारे आदींचा समावेश होता.आंदोलनात संजय सरायकर, महेश श्रीवास, अभय रणदिवे, मनोहर तांबुलकर, ज्ञानेश्वर ठाकरे, रवी गाडगे, दिनेश तराळे, प्रवीण गवरे, पंकज निघोट, मोतीराम मोहाडीकर, अब्दुल शकील, इर्शाद मलिक, देवेंद्र रोटेले, सूरज आवळे, रजत देशमुख, विश्वेश्वर अहिरकर, गोपाल पट्टम, राजेश कुंभलकर, अरुण डवरे, दीपक वानखेडे, आशिष दीक्षित आदी सहभागी झाले होते.