मुंबई : मुंबई सेंट्रल येथील तब्बल १३० वर्षे आयुर्मान पूर्ण झालेला ब्रिटिशकालीन बेलासिस रेल्वे उड्डाणपूल १ डिसेंबरपासून वाहतुकीसाठी बंद करण्याचा रेल्वे विचार करीत आहे. पूल बंद झाल्यानंतर पादचाऱ्यांना रेल्वे स्थानकात पोहोचण्यासाठी येणारी अडचण लक्षात घेऊन पश्चिम रेल्वेकडून सरकत्या जिन्यांसह तात्पुरता पादचारी पूल उभारण्यात येणार आहे.
मुंबईतील ब्रिटिशकालीन पुलांचे आयुर्मान पूर्ण झाले आहे. शहरातील वाहनांची संख्या मोठ्या प्रमाणात वाढत असल्याने सर्व पुलांची टप्प्याटप्याने पुनर्बांधणी करण्याचा निर्णय रेल्वे प्रशासनाने घेतला आहे. रेल्वे रुळांवरील वाहने आणि पादचाऱ्यांच्या वाहतुकीसाठी सन १८९३मध्ये बेलासिस रेल्वे उड्डाणपूल उभारण्यात आला होता. पश्चिम रेल्वेने शहरातील पुलांची संरचनात्मक तपासणी केल्यानंतर हा पूल वाहतुकीसाठी धोकादायक ठरवण्यात आला होता. त्यामुळे पुलाची पुनर्बांधणी करण्याची शिफारस करण्यात आली होती.बेलासिस पुलाच्या पुनर्बांधणीसाठी पुलावरील वाहतूक बंद करावी लागणार आहे. यासाठी साधारणत: १ डिसेंबर ही तारीख निश्चित करण्यात आली आहे. ‘पूल बंद झाल्यावर स्थानिक पादचारी आणि रेल्वे प्रवाशांच्या सोयीसाठी मुंबई सेंट्रल स्थानकातील मुख्य तिकीट खिडकीला जोडणारा तात्पुरता पूल उभारण्यात येणार आहे. अशा प्रकारचा हा मुंबईतील पहिलाच प्रयोग असणार आहे’, असे पश्चिम रेल्वेचे विभागीय रेल्वे व्यवस्थापक नीरज वर्मा यांनी सांगितले. प्रवाशांसाठीच्या पुलाच्या उभारणीचे काम १६ नोव्हेंबरपासून सुरू करण्यात येणार आहे. चार महिन्यांमध्ये म्हणजेच १६ फेब्रुवारी, २०२४पर्यंत पूल वापरासाठी खुला करण्याचे नियोजन आहे. पादचारी पुलाचा आराखडा रेल्वे मुख्यालयाने मंजूर केला आहे.
Users Today : 26