छत्रपती संभाजीनगर : ‘एनओसी (ना हरकत प्रमाणपत्र) देऊन हात झटकू नका. काम पूर्ण होईपर्यंत त्यावर लक्ष ठेवा. काम दर्जेदार पद्धतीने सुरू करा,’ असे आदेश महापालिकेचे प्रशासक जी. श्रीकांत यांनी अधिकाऱ्यांना दिले.आमदार, खासदारांच्या विकास निधीतून शहरात विविध कामे केली जातात. प्रामुख्याने रस्त्यांची कामे या निधीतून केली जातात. ही कामे करण्यासाठी महापालिकेच्या एनओसीची गरज असते. पालिकेकडून एनओसी मिळाल्यावर सार्वजनिक बांधकाम विभागाच्या माध्यमातून कामे केली जातात. या कामांचा आढावा जी. श्रीकांत यांनी घेतला.रस्त्याच्या दर्जावर नाराजी
आमदार, खासदार निधीतून केल्या जाणाऱ्या रस्त्यांच्या कामांच्या दर्जाबद्दल प्रामुख्याने तक्रारी केल्या जातात. निकषानुसार ही कामे केली जात नाहीत. वीजेचे खांब, जलवाहिन्या, ड्रेनेज लाइनचे शिफ्टिंग न करता ही कामे केली जातात. त्यामुळे काही समस्या निर्माण झाल्यास रस्ता खोदावा लागतो अशा तक्रारी प्राप्त झाल्या, यावर प्रशासकांनी नाराजी व्यक्त केली.आयुक्तांनी दिल्या सूचना
‘अधिकाऱ्यांशी संवाद साधताना त्यांनी विविध कामांच्या एनओसी देऊन हात झटकू नका असे बजावले. ज्या कामासाठी एनओसी दिली आहे ते काम पूर्ण होईपर्यंत लक्ष ठेवा. निकषानुसार काम करून घ्या. कामाचा दर्जा चांगला राखला जाईल,’ याकडे लक्ष द्या असे त्यांनी अधिकाऱ्यांना सांगितले.
समस्या सोडवण्याचे आश्वासन
प्रशासकांनी कमलनयन बजाज हॉस्पिटलच्या पाठीमागील अमेयनगरला भेट दिली. या भागात आमदार निधीतून रस्त्याची कामे केली जात आहेत. ड्रेनेज लाइन आणि पथदिव्यांची कामे देखील या ठिकाणी बाकी आहेत. या संपूर्ण परिसराची पाहणी प्रशासकांनी केली. नागरिकांनी या भागातील नागरी समस्या सोडवण्याची मागणी त्यांच्याकडे केली, समस्या सोडवण्याचे आश्वासन प्रशासकांनी नागरिकांना दिले.
देवळाई चौकात पाहणी
देवळाई चौकापासून सोलापूर-धुळे महामार्गाच्या लगत नवीन पाणीपुरवठा योजनेअंतर्गत जलवाहिनी टाकण्याचे काम केले जात आहे. एका खासगी जागेतून जलवाहिनी टाकावी लागणार आहे. मात्र, जागा मालकाने त्याला परवानगी दिली नाही. प्रशासकांनी या जागेची पाहणी केली आणि नियोजनानुसार काम करा, ले आउट मंजुरीच्या वेळी आवश्यक ती कार्यवाही केली जाईल, असे प्रशासकांनी सांगितल्याचे सूत्रांनी सांगितले.
Users Today : 26