यवतमाळ: वैद्यकीय अभ्यासक्रमांसाठी घेण्यात येणाऱ्या नीट परीक्षेत डमी उमेदवार बसवून परिक्षा उत्तीर्ण करुन देणाऱ्या आंतरराज्य रॅकेटचा पर्दाफाश करण्यात पोलिसांना यश आले. याप्रकरणी पोलिसांनी मुख्य आरोपीलाही अटक केली आहे. ही कारवाई स्थानिक गुन्हे शाखेच्या पथकाने केली. जितेंद्र रामगोपाल गाठचौधरी (२२) रा. घुगल बिकानेर पोस्टे नया शहर ठाणा बिकानेर, राजस्थान, महाविर सिखरचंद नाई रा. गयाशहर पावु चौक बिकानेर, राजस्थान,आकार चंद्रकांत पाटील रा. कोपरी पालघर जि. पालघर, गजानन मधुकर मोरे (३६) रा. नांदेड, नागनाथ गोविंद दहीफळे (४२) रा. नांदेड, राजीव रामपदारथलाल कर्ण (४४) रा. झारखंड,नरेश बलदेवराम विष्णोई (२२) रा. जोधपुर राजस्थान असे अटक करण्यात आलेल्या आरोपीचे नाव आहे.
मिळालेल्या माहितीनुसार, कार्तिक सुभाष कान्हे (२६) लिपिक पोदार इंटरनॅशनल स्कूल यवतमाळ रा. गोधनी रोड यांनी ७ मे २०२३ यवतमाळ शहर पोलिसात पोदार स्कुलमध्ये नीट परिक्षेत डमी उमेदवार बसविल्याचे तक्रार दिली होती. त्यावरून शाळेवर एन.टी.ए. दिल्लीमार्फत याबाबत पडताळणी करण्यात आली. यात पालघर जिल्ह्यातील कोपरी पालघर येथील रहिवासी असलेल्या आकार चंद्रकांत पाटील आणि अल्पवयीन बालकाची पुन्हा चौकशी करण्यात आली. तेव्हा सदर उमेदवारांच्या जागी राजस्थान बिकानेरच्या नया शहर ठाणे येथील रहिवासी जितेंद्र रामगोपाल गाठ चौधरी आणि गया शहरातील रहिवासी महावीर सिखरचंद नाई यांनी नीट परीक्षा दिल्याचे उघड झाले.बनावट प्रवेशपत्र आणि बनावट आधार कार्ड वापरून नीट परीक्षा दिल्या प्रकरणी यवतमाळ शहर पोलिसांनी विविध कलमान्वये गुन्हा दाखल करून तपास सुरू केला. सदर गुन्ह्याचे गांभीर्य व व्याप्ती लक्षात घेऊन पोलीस अधीक्षकांनी तातडीने या गुन्ह्याचा तपास स्थानिक गुन्हे शाखेकडे वर्ग केला. स्थानिक गुन्हे शाखेने सदर गुन्ह्याचा तपास केल्यानंतर एनईईटी परीक्षेत बसलेल्या सदर डमी उमेदवारांना अटक केली. गुन्ह्याबाबत सविस्तर चौकशी केली असता त्याच्याकडून या गुन्ह्यात सहभागी असलेले इतर आरोपी निष्पन्न करून त्यांना अटक केली.
Users Today : 19