समृद्धी महामार्गावर पुन्हा अपघात, खासगी बसच्या टायरमधील हवा तपासताना भरधाव ट्रकची धडक, दोघांचा मृत्यू

बुलढाणा: बुलढाणा जिल्ह्यातील समृद्धी महामार्ग हा नेहमी अपघातांमुळेच चर्चेत असतो.समृद्धी महामार्गावरील अपघातांची मालिका अद्यापही कायम आहे. आरटीओकडून वारंवार सूचना करूनदेखील समृद्धी महामार्गावरील प्रवासासाठी दिल्या गेलेल्या सूचना चालक पाळत नाहीत आणि यामुळे अपघातांच्या घटना घडत आहेत. गुरुवारी सकाळी झालेल्या अपघात चालकाच्या हलगर्जीपणामुळे घडल्याचे समोर आले आहे. टायरमधील हवा चेक करण्यासाठी खाली उतरलेल्या चालकाला ट्रकने धडक दिली. या भीषण अपघातात चालकाचा जागीच मृत्यू झाला. तर बसमधील एका प्रवाशाची मृत्यू झाला आहे.याबाबत अधिक माहिती अशी की, मुंबईहून नागपूरच्या दिशेने खाजगी बस प्रवाशांना घेऊन जात होती. यावेळी खासगी बसचा चालक टायरमधील हवा तपासायला खाली उतरला असता मागून येणाऱ्या मालवाहक वाहनाने धडक दिल्याने हा अपघात घडला. गणराज ट्रॅव्हल्सची बस क्रमांक mh 14 HG 5999 ही मुंबईवरून नागपूरला जात होती. दरम्यान, बुलढाणा जिल्ह्यातील मेहकर नजीक बसच्या टायरची हवा तपासण्याकरता चालक बसमधून खाली उतरला. याचवेळी मागून भरधाव वेगाने येणाऱ्या ट्रकने wb 23 E 0803 खासगी ट्रॅव्हल्सला जोरदार धडक दिली. यात बसचालक जागीच ठार झाला असून बसमधील एका प्रवाशाचा मृत्यू झाला आहे. या बसमधून एकूण ३७ प्रवासी प्रवास करत होते. सदर अपघाताची घटना गुरुवारी पहाटे साडेपाच वाजेच्या दरम्यान घडली.ऑक्टोबर महिन्यातदेखील समृद्धी महामार्गावर खाजगी ट्रॅव्हल्सचा भीषण अपघात झाला होता. या अपघातात १२ जणांना आपले प्राण गमवावे लागले होते. बुलढाण्यातील सैलानीबाबांचे दर्शन करुन परतत असताना वैजापूर टोलनाक्यावर हा अपघात झाला होता. परिवहन विभागाच्या अधिकाऱ्यांना ट्रकची तपासणी करण्यासाठी ट्रक थांबवला. अचानक थांबलेल्या ट्रकवर मागील बाजूने ट्रॅव्हल्स आदळल्याने भीषण अपघात झाला होता.