पुणे : वाढत्या प्रदूषणामुळे बांधकाम प्रकल्पांसाठी लागू करण्यात आलेल्या प्रतिबंधात्मक उपाययोजनांनुसार ‘महामेट्रो’लाही बांधकामांच्या ठिकाणी आवश्यक उपाययोजना करण्याच्या सूचना पालिकेने दिल्या आहेत. स्वारगेट येथील मेट्रो हबमधील रेडी मिक्स काँक्रिट अर्थात आरएमसी प्लांटच्या ठिकाणी तीन दिवसांत २५ फूट पत्रे व हिरवी जाळी लावावी; अन्यथा काम थांबविण्याचा इशारा पालिकेतर्फे देण्यात आला आहे.
शहरात ‘महामेट्रो’तर्फे दोन मार्गिकांचे काम सुरू आहे. यात पिंपरी-चिंचवड ते स्वारगेट मेट्रो मार्गिकेसाठी स्वारगेट येथे मेट्रो हब उभारण्यात येत आहे. हे हब अत्यंत वर्दळीच्या जेधे चौकालगत असून, त्यासमोरच एसटी स्थानक व पीएमपी डेपोही आहे. या मेट्रो हबमध्ये भूमिगत मेट्रो स्टेशनसह वर बहुमजली व्यावसायिक इमारत उभारली जाणार आहे. हे काम वेगाने सुरू असून बांधकामासाठी आवश्यक काँक्रिट जागीच उपलब्ध व्हावे, यासाठी येथे रेडी मिक्स काँक्रिट प्लांट (आरएमसी) उभारण्यात आला आहे. हा प्लांट सातत्याने सुरू असतो. बांधकामासाठी आवश्यक साहित्य आणणाऱ्या वाहनांचीही येथे सातत्याने ये-जा सुरू असते. त्यामुळे प्रदूषणात भर पडत असल्याची तक्रार केली जात होती. या पार्श्वभूमीवर महापालिका आयुक्तांनी ‘महामेट्रो’च्या पदाधिकाऱ्यांशी संपर्क साधून त्यांना आवश्यक उपाययोजना करण्याच्या सूचना दिल्या.मात्र, येथील कामाच्या भोवती पत्रे लावण्यात आले असले; तरी आरएमसी प्लांटलगत पत्रे लावलेले नाहीत. तसेच, हिरवी जाळीही लावलेली नाही. त्यामुळे येत्या तीन दिवसांत आवश्यक उपाययोजना न केल्यास येथील काम थांबविण्याचा इशारा महापालिका आयुक्त तथा प्रशासक विक्रमकुमार यांनी दिले आहेत.
Users Today : 45