पुणे : शहरात दिवाळीच्या दिवसांत मोठ्या प्रमाणावर फोडण्यात आलेल्या फटाक्यांमुळे श्वसनाबरोबरच डोळ्यांचे आजार झाल्याचे समोर आले आहे. फटाका चेहऱ्याजवळ फुटल्याने अनेकांच्या डोळ्यांना दुखापत झाली आहे. डोळ्यांच्या बुबुळांना दुखापत होणे, पापण्यांचे केस जळणे, डोळ्यातून पाणी येणे, आवाजाने डोके दुखणे यांसह डोळ्यांचा पडदा फाटणे या प्रकारचे रुग्ण शहरात गेल्या काही दिवसांत आढळल्याचे निरीक्षण नेत्ररोग तज्ज्ञांनी नोंदविले आहे.
पुणे जिल्हा शल्यचिकित्सक डॉ. नागनाथ यमपल्ले म्हणाले, की फटाक्यांमुळे दुखापत झालेल्या पाच ते सात रुग्णांवर औंध जिल्हा रुग्णालयात उपचार करण्यात आले आहेत. यंदा गंभीर स्वरूपाच्या रुग्णांची संख्या कमी असल्याचे दिसून आले आहे. गेल्या आठवड्यांमध्ये फटाक्यांमुळे दुखापत झाल्याचे रुग्ण आढळल्याचे ससून रुग्णालयातील डॉक्टरांनी सांगितले.गेल्या काही दिवसांत फटाक्यांमुळे डोळ्यांना दुखापत झाल्याचे रुग्ण आढळले आहेत. गेल्या आठवड्यात दिवसाला सरासरी चार ते पाच रुग्ण रुग्णालयात येत होते. डोळ्यांजवळ फटाका फुटल्याने डोळा फाटणे, बुबुळांना दुखापत होणे, चेहरा जळणे या प्रकारचे रुग्ण आढळले आहेत.- डॉ. समीर दातार, नेत्ररोगतज्ज्ञ
डोळे, कान, घशाचा त्रास होत असल्याचे रुग्ण आढळले. डोळे खाजवणे, ऐकू कमी येणे, कानाचा पडदा फाटणे या प्रकारची लक्षणे काही रुग्णांमध्ये आढळली आहेत. आवाजामुळे चक्कर येणे, डोळ्यांतून पाणी येणे, डोके दुखणे या प्रकारचा त्रास ज्येष्ठ नागरिकांना झाल्याचे दिसून येत आहे.- डॉ. मुरारजी घाडगे, कान, नाक, घसातज्ज्ञ
फटाका चेहऱ्याजवळ फुटल्याने डोळ्यांच्या बुबुळाला दुखापत होणे, पापण्यांचे केस जळणे असे रुग्ण आढळले आहेत. पापण्यांचे केस जळल्यामुळे त्याचे गंभीर परिणाम होऊ शकतात. फटाक्यामुळे दुखापत झाल्यावर काही रुग्णांनी सॅनिटायझर लावल्याचे दिसून आले आहे. त्यामुळे ज्यांना फटाक्यामुळे दुखापत झाली आहे, त्यांनी स्वतःच्या मनाने उपचार करू नयेत.- डॉ. संजय पाटील, नेत्ररोगतज्ज्ञ
Users Today : 16