दारु सोडण्यावरुन वाद, मेहुण्याचे भाऊजीवर जीवघेणे वार, मरणासन्न अवस्थेत नाल्यात टाकलं अन्…

वाशिम: वाशिमच्या मालेगाव तालुक्यातील झोडगा गावाजवळ असलेल्या एका बंद धाब्याच्या समोर दारु सोडवण्यासाठी नेत असतांना जावयाने केलेल्या हल्ल्याला प्रतिउत्तर देतांना मेहुण्याने लोखंडी जॅक आणि कोयत्यानं वार करुन जावयाची निर्घृण हत्या केल्याची घटना घडली. हल्ला केल्यानंतर मेहुण्याने स्वतःच मालेगाव पोलिस स्टेशनमध्ये जाऊन माहिती दिली. पोलिसांनी खुनाचा गुन्हा दाखल करून पुढील तपास सुरू केला आहे.

दरम्यान, या संदर्भात पोलिसांनी दिलेल्या माहिती नुसार तक्रारकर्ता नामदेव शिवाजी भुसारी (वय ३२) रा. किनखेडा ता. जि. वाशीम (मेव्हणा) याने स्वतःहून फिर्याद दिली की, त्याचे बहीण जावई सुभाष डिगांबर मापारी रा. बोरी मापारी हे त्याला वाशिम बसस्थानक परिसरात असलेल्या दारुच्या दुकानाजवळ भेटले. भुसारी यांनी त्यांना सांगितले की, आपल्याला दारु सोडवण्याकरिता बाहेरगावी जायचे आहे. त्यानुसार दोघे वाहन क्र. एमएच १२ आर. एन. ९१३८ ने निघाले.भुसारी वाहन चालवत असताना मालेगाव रस्त्याने झोडगा गावाजवळ आल्यावर बाजुला बसलेल्या जावयाने सोबत दारु सोडवण्याच्या कारणावरुन वाद घालायला सुरुवात केली आणि मेहुण्याच्या डाव्या हातावर कोयत्याने वार केला. त्यानंतर भुसारी याने वाहनामध्ये असलेला जॅक हातात घेवून जावयाच्या डोक्यावर मारला. जावयाच्या हातातील कोयता हिसकावून जावयावर कोयत्याने सपासप वार केले. जावई मरणासन्न अवस्थेत पडल्याने त्याला उचलून रस्त्याच्या बाजूला असलेल्या नालीमध्ये टाकून दिले, कोयता तिथेच टाकून दिला आणि पोलिस स्टेशन मालेगाव इथे येऊन तक्रार दिली.ही माहिती मिळताच पोलिस हेड कॉन्स्टेबल कैलास कोकाटे, शिवाजी काळे यांनी घटनास्थळी जावून पाहणी केली असता झोडगा बु. गावाजवळील जयस्वाल यांच्या बंद धाब्यासमोरील रस्त्याच्या बाजूला खोलगट नालीमध्ये मृतदेह आढळून आला. या इसमावर धारदार शस्त्राने वार केल्याचे आढळून आले. मोठ्या प्रमाणात रक्तस्त्राव झाल्याने त्या इसमाचा मृत्यू झाल्याचे घटनास्थळी दिसून आले. याबाबत मृतकाच्या नातेवाईकाशी संपर्क साधून ओळख पटविली असता सुभाष डिगांबर मापारी यांचा मृतदेह असल्याचे निष्पन्न झाले.

याबाबत आरोपीने स्वतः दिलेल्या फिर्यादीवरुन मेहुणा नामदेव शिवाजी भुसारी रा. किनखेडा ह. मु. गणेश नगर काटा रोड वाशिम यांचेविरुद्ध कलम ३०२ भादंवि प्रमाणे गुन्हा दाखल करण्यात आला असून, पुढील तपास सहाय्यक पोलिस निरीक्षक स्वप्निल तायडे हे करत आहेत. दारूच्या व्यसनामुळे दोन घरं उद्ध्वस्त झाले आहेत. जावयाचा खून झाला तर मेहुणा तुरुंगात गेला आहे.