पश्चिम महाराष्ट्रात अनेक जुनी संस्थाने, त्यात जुने रेकॉर्ड्स, कुणबीच्या जुन्या नोंदी तपासा विभागीय आयुक्तांचे आदेश

न्या. शिंदे समिती शनिवारी पुण्यात येत आहे. त्या अनुषंगाने सर्व जिल्हाधिकाऱ्यांची आढावा बैठक घेतली. प्रत्येक जिल्ह्यात मराठा नोंदीविषयक किती कागदपत्रे तपासण्यात आली. त्यापैकी कुणबीची नोंद किती आहे. कुणबी मराठा, मराठा कुणबी अशा नोंदी किती ठिकाणी आहे त्याचा आढावा घेण्यात आला आहे. पश्चिम महाराष्ट्रातील अनेक जुनी संस्थांने आहेत. भोर, औंध, मिरज, सातारा यासारख्या संस्थांनाकडे जुने रेकॉर्डस उपलब्ध आहेत. त्या जुन्या रेकॉर्डसची तपासणी करा असे पाचही जिल्हाधिकाऱ्यांना आदेश देण्यात आले आहेत, ‘ अशी माहिती विभागीय आयुक्त सौरव राव यांनी दिली.राव म्हणाले, नोंदणीची तपासणी, त्यानुसार, घेण्यात आलेले निर्णय आणि त्याचा तपशीलही प्राप्त करून घ्यायचा आहे. एखाद्या व्यक्तीने जात प्रमाणपत्रासाठी अर्ज केला असेल तर त्याचा अर्ज फेटाळला आहे. तर त्याचा अर्ज नामंजूर करण्याचे कारण काय आहे, एखाद्या व्यक्तीला ‘मराठा कुणबी’ म्हणून जात प्रमाणपत्र मिळाले असेल आणि त्याच्या पडताळणीसाठी त्याने अर्ज केल्यास त्याला तिकडेही नाकारले असेल तर त्याचे कारण काय आहे अशा सर्व अर्ज नामंजूर करणे किंवा जात पडताळणीमध्ये प्रमाणपत्र नाकारण्याच्या कारणांची मिमांसा केली जाणार आहे. त्याबाबत माहिती संकलित करण्याचे आदेश देण्यात आले आहेत.कुणबी नोंदीबाबतच्या बहुतांश माहिती फारशी, उर्दू, कन्नड, मोडी लिपीमध्ये आहे. ही उपलब्ध माहिती तातडीने भाषांतर करणे आवश्यक आहे. त्याकरिता उपलब्ध माहितीचे त्वरीत भाषांतर करणे, तसेच अनुवादकांची (ट्रान्सलेटर) उपलब्धता आहे का याची माहिती संकलित करण्याचे आदेश देण्यात आले आहेत- सौरव राव, विभागीय आयुक्त