वेध लोकसभा निवडणुकीचा : पुण्यात भाजप हॅट्रिक करणार? धंगेकरांच्या विजयाने काँग्रेसला आत्मविश्वास!

पुणे : दिवंगत खासदार गिरीश बापट यांच्या निधनानंतर पुणे लोकसभेची जागा रिक्त आहे. खरं तर गिरीश बापट यांच्या निधनानंतर पुणे लोकसभेच्या जागेवर पोटनिवडणूक होणे अपेक्षित होते. मात्र, या जागेवर काही पोटनिवडणूक झाली नाही. त्यामुळे काही महिन्यातच येऊ घातलेल्या लोकसभा निवडणुकीत पुणे लोकसभेचा खासदार कोण असेल यासाठी आता सर्वच पक्षातून मोर्चे बांधणीला सुरूवात झाली आहे. २०१४ पासून या लोकसभा मतदारसंघावर भाजपचा झेंडा फडकत आहे. सुरेश कलमाडी यांच्यानंतर काँग्रेसची पुणे लोकसभेवरची पकड निसटली झाली. मोदी लाटेत अनिल शिरोळे आणि त्यानंतर गिरीश बापट यांनी पुणे लोकसभेवर विजय मिळवला. मुख्यत: काँग्रेस विरुद्ध भाजप अशीच पुणे लोकसभेत लढत होते. २०१४ आधी भाजप आणि काँग्रेसमध्ये निकराची लढाई होत असे. मात्र २०१४ नंतर काँग्रेसला तगडा उमेदवार मिळालेला नाही. दुसरीकडे गिरीश बापट यांच्यानंतर भाजपमध्येही उमेदवारीसाठी अनेक जण प्रयत्न करत आहेत.महायुतीमध्ये ही जागा भाजपकडे आहे तर शिवसेना, राष्ट्रवादी आणि काँग्रेस यांच्या महाविकास आघाडीमध्ये ही जागा काँग्रेस लढवणार असल्याचं जवळपास निश्चित आहे. त्यामुळे पुण्यामध्ये भाजप विरुद्ध काँग्रेस असा सरळ सामना पाहायला मिळेल. भाजपकडून अनेक नावं समोर येत आहेत तसंच काँग्रेसकडून देखील अनेक इच्छुक तयारीला लागल्याचे दिसत आहे.                                                                                                          भाजपमधून कुणाची नावे चर्चेत?

भाजप तर्फे माजी महापौर मुरलीधर मोहोळ, माजी शहराध्यक्ष जगदीश मुळीक, दिवंगत खासदार गिरीश बापट यांच्या सूनबाई स्वरदा बापट यांची नावे सुरुवातीपासून पुणे लोकसभा मतदारसंघासाठी चर्चेत आहेत. मात्र, याशिवाय भाजपकडून सुनील देवधर यांचं नाव धक्कादायकरित्या समोर आलं आहे. सुनील देवधर यांनी देखील आपल्या मोर्चे बांधणीला सुरूवात केल्याचं पाहायला मिळत आहे. पुणे लोकसभा मतदारसंघात त्यांचे दौरे वाढताना दिसत आहेत. राष्ट्रीय स्वयंसेवक संघातील आवडता चेहरा आणि संघटन कौशल्य या सुनील देवधर यांच्या पथ्यावर पडणाऱ्या गोष्टी आहेत. त्यामुळे स्थानिक नेत्यांपेक्षाही सुनील देवधर यांच्या नावाला भाजपमधून अंतर्गत पसंती जास्त असल्याची चर्चा होतीये.                      काँग्रेसची पुणे लोकसभेवरची पकड निसटली

दुसरीकडे महाविकास आघाडीमधून काँग्रेस पुणे लोकसभेच्या जागेवर दावा करणार हे निश्चित आहे. पारंपारिकरित्या ही जागा काँग्रेसचीच आहे. १९५२ ते १९५७, १९६२ ते १९६७, १९७१ ते १९७७, १९८० ते १९८४, १९८४ ते १९८९, १९८९ ते १९९१, १९९६ ते १९९८, १९९८ ते १९९९, २००४ ते २००९, २००९ ते २०१४ या कालावधीमध्ये तब्बल १० लोकसभा निवडणुकांत काँग्रेसचा खासदार या मतदारसंघावर निवडून आला आहे. मात्र २०१४ नंतर देशासह पुण्यात देखील काँग्रेसला उतरती कळा लागली आणि काँग्रेसची पुणे लोकसभा मतदारसंघावरील पकड देखील ढिली झाली .                       धंगेकरांच्या विजयाने काँग्रेसला आत्मविश्वास

आता गिरीश बापट यांच्या निधनानंतर पुणे भाजपला सर्वमान्य चेहरा शिल्लक नसल्याने काँग्रेसला पुन्हा एकदा आपला मतदारसंघ काबीज करण्याची संधी चालून आली आहे. कसबा विधानसभा मतदारसंघाच्या दिवंगत आमदार मुक्ता टिळक यांच्या निधनानंतर झालेल्या पोटनिवडणुकीत काँग्रेसने भाजपचा पारंपरिक मतदारसंघ खेचून आणत या ठिकाणी काँग्रेसचे रवींद्र धंगेकर विजय झाले होते. या विजयानंतर पुण्यातील काँग्रेसला नवं बळ मिळालं असून पुन्हा एकदा पुणे लोकसभेची जागा आपण काबीज करू असा विश्वास काँग्रेसला वाटत आहे.                                                       काँग्रेसमधून लोकसभेचा उमेदवार कोण असेल?

काँग्रेसमधून पुणे लोकसभा निवडणूक लढवण्यासाठी मोहन जोशी, शहराध्यक्ष अरविंद शिंदे, आणि कसबा विधानसभा मतदारसंघाचे आमदार रवींद्र धंगेकर हे इच्छुक आहेत. सुरेश कलमाडी यांनी पुणे काँग्रेसचे एकहाती नेतृत्व केलं. ते २००४ ते २०१४ दरम्यान पुणे लोकसभेचे खासदार होते. मात्र त्यानंतर पुणे काँग्रेस पक्षाला भाजपला टक्कर देईल असा नेता सापडलेला दिसत नाही. २०१४ च्या लोकसभा निवडणुकीत विश्वजीत कदम आणि २०१९ च्या लोकसभा निवडणुकीत मोहन जोशी यांना काँग्रेसने निवडणूक लढवण्याची संधी दिली होती. मात्र या दोघांना देखील पराभवला सामोरे जावे लागले होते. मात्र, आता गिरीश बापट यांच्या निधनानंतर भाजपकडून पुणे लोकसभेसाठी कोण चेहरा असणार हे निश्चित नसल्याने काँग्रेसला आपली जागा पुन्हा एकदा काबीज करण्याची ही नामी संधी आहे. त्यामुळे काँग्रेस आता नक्की कुणाला मैदानात उतरवणार आणि काय रणनीती आखणार? यावर पुणे लोकसभेचे पुढील गणिते अवलंबून असणार आहेत.                    पुण्यात मनसे फॅक्टर महत्वाचा ठरणार
पुणे लोकसभा निवडणुकीसाठी प्रामुख्याने लढत भाजप आणि काँग्रेस यांच्यामध्ये असली तरी पुण्यातील मनसे फॅक्टर नाकारून चालणार नाही. पुण्यात महाराष्ट्र नवनिर्माण सेनेने (मनसे) लोकसभा निवडणुकीच्या तयारीला सुरूवात केली आहे. मागील निवडणुकीमध्ये उमेदवारही न देताना तटस्थ राहिलेल्या मनसेने यावेळी पुण्याकडे विशेष लक्ष केंद्रित केले आहे. मनसेचे नेते अमित ठाकरे यांनी दैनंदिन नियोजनाकडे लक्ष देण्यास सुरूवात केली असल्याने यावेळची पुण्याची जागा ‘मनसे’ लढविणार असल्याचे स्पष्ट झाले आहे. शहराध्यक्ष साईनाथ बाबर, माजी नगरसेवक वसंत मोरे यांची नावे लोकसभा उमेदवारीसाठी चर्चेत आहेत. वसंत मोरे यांनी तर आपल्या तयारीला देखील सुरूवात केली आहे. शहरातील वेगवेगळ्या ठिकाणी बॅनर्स लावून ‘पुण्याची पसंत-मोरे वसंत’ असं म्हणत वातावरण निर्मिती करायला वसंत मोरे यांनी सुरूवात केली आहे.