भाऊ भाजपकडून इच्छुक, माजी महापौरांचीही लोकसभा लढवण्याची घोषणा, कोणत्या पक्षाकडून रिंगणात?

नाशिक : नाशिक जिल्ह्याच्या विकासाकरिता आगमी लोकसभा निवडणूक लढविणार असल्याची घोषणा माजी महापौर दशरथ पाटील यांनी केली. सोमवारी वाढदिवसानिमित्त आयोजित कार्यक्रमात ते बोलत होते. लोकसभा निवडणुकीच्या तयारीतील इच्छुकांतून थेट उमेदवारीचा दावा करण्यात पाटील यांनी आघाडी घेतल्याने अनेकांच्या भुवया उंचावल्या आहेत.

अगोदरच दशरथ पाटील यांचे बंधू दिनकर पाटील लोकसभेसाठी भाजपकडून इच्छुक असताना आता खुद्द दशरथ पाटील यांच्याच उमेदवारीच्या घोषणेमुळे आगामी काळात लोकसभा निवडणुकीचे रण चांगलेच तापण्याची चिन्हे आहेत.दशरथ पाटील यांनी भाषणातून अनेकांचा समाचार घेतला. ते म्हणाले, की महापौर असताना प्रशासनावर वचक ठेवत आपण अनेक विकास कामे केली. नाशिककरांनी देखील माझ्या कामांचे कौतुक केले. परंतु, गेल्या काही वर्षांत शहरातील रस्त्यांची दुरवस्था झाली असल्याचे चित्र आहे. प्रशासनाने याबाबत लक्ष दिले पाहिजे. मात्र, तसे होताना दिसत नाही. त्यामुळे नाशिकच्या राजकारणात वेगळी दिशा देण्यासाठी, तसेच शहर आणि जिल्ह्याचा विकास साधण्यासाठी २०२४ ची लोकसभा निवडणूक आपण लढणार आहोत.मात्र, पाटील नेमक्या कोणत्या पक्षाकडून निवडणूक लढविणार याबाबत संदिग्धता असली, तरी त्यांनी स्वत:ची उमेदवारी जाहीर केल्याने नाशिक लोकसभेची समीकरणे रंगतदार ठरण्याची स्थिती निर्माण झाली आहे. दरम्यान, पाटील यांच्या वाढदिवसानिमित्त विविध कार्यक्रम झाले. नागरिकांसह विविध क्षेत्रांतील मान्यवरांनी त्यांना शुभेच्छा दिल्या.