मोठ्या पवारांना शुभेच्छा, छोट्या पवारांना आशीर्वाद मधले पवार चुकीच्या झाडाला लटकलेत, राऊतांची घणाघाती टीका

नागपूर : राष्ट्रवादी काँग्रेसचे शरद पवार गटाचे आमदार रोहित पवार यांच्या नेतृत्वाखाली काढलेल्या युवा संघर्ष यात्रेचा आज नागपुरात समारोप झाला. या समारोप सभेत संजय राऊत बोलत होते. त्यावेळी राऊत यांनी आपल्याच शैलीत सत्ताधाऱ्यांवर टीका केली. संजय राऊत यांनी राज्याचे उपमुख्यमंत्री अजित पवार यांच्यावर टीका केली. मोठ्या पवारांना वाढदिवसाच्या शुभेच्छा देण्यासाठी आणि धाकट्या पवारांना आशीर्वाद देण्यासाठी आज आपण आलो आहोत, पण मधला पवार कुठेतरी लटकला आहे, असे राऊत म्हणाले. ते चुकीच्या झाडाला लटकले आहे, त्यांना लटकतच राहू द्या, लटकत लटकट खाली पडतील, आणि मग त्यांना कळेल आपण चुकीच्या झाडावर लटकलो, अशी टीका संजय राऊत यांनी केली.पुढे बोलताना राऊत म्हणाले की, ही मर्दांची सभा आहे. ही लढणाऱ्यांची सभा आहे. संघर्ष करणाऱ्यांची ही सभा आहे. ही पळपुट्यांची सभा नाही आहे. आम्ही उठू संघर्ष करू आणि या महाराष्ट्रात महाविकास आघाडीचे सरकार आणू. मध्य प्रदेशची हवा महाराष्ट्राला लागू देणार नाही, असेही राऊत म्हणाले. पंतप्रधान नरेंद्र मोदी देशभर गॅरंटी देत आहेत. पण आजची ही सभा नरेंद्र मोदीं यांना ही गॅरंटी देते की, २०२४ ला तुम्ही सत्तेवर येणार नाही. ही आमची गॅरंटी आहे. फडणवीस २०२४ मध्ये तुम्ही सत्तेत नसल्याची गॅरंटी आहे. अनिल देशमुख हे तुरुंगातील मित्र आहे. जेलमधली मैत्री पक्की असते. आम्ही झुकलो नाही. आम्ही वाकलो नाही आम्ही तुटलो नाही.मी बाळासाहेब ठाकरेंचा शिवसैनिक आहे. पवार साहेबांचाही मी माणूस आहे. याला म्हणतात डबल इंजिन. रोहित पवार यांनी ८०० किलोमीटरचा प्रवास केला आहे. गेल्या १० वर्षांपासून हा देश थांबला आहे, म्हणून आपल्याला चालावं लागतं, असेही संजय राऊत म्हणाले. आजची सभा प्रचंड मोठी आहे. हा महाराष्ट्र झुकणार नाही. आमचा पक्ष तोडून आम्ही तुम्हाला २०२४ च्या निवडणुकीत फोडू. शरद पवार यांचे वय किती? बाळासाहेबांचे वय तसे नव्हते. त्यामुळे आमच्या पाठीवर हात ठेवा आणि फक्त लढ म्हणा, असे आवाहन संजय राऊत यांनी करत महाआघाडी ही डबल इंजिन नाही आहे. हे एक फुल आणि दोन डाऊटफुल आहे, अशी टीका संजय राऊत यांनी सत्ताधारी महाआघाडीवर केली आहे.